Komandu La Tolera Membru PNTL Lanu Durante Asegura Natál-Tinan Foun

Hatutan.com, (22 Dezembru 2021), Díli—Komandu Jerál Polísia Nasionál Timor-Leste (PNTL), sei la tolera membru ne’ebé konsumu alkól (tua), durante hala’o seguransa ba komunidade iha Natál no tinan foun 2022.

Komandante Jerál PNTL, Komisáriu Polísia, Faustino da Costa, hala’o orientasaun ba membru sira atu asegura loron boot Natal no Tinan Foun, iha Kuartél Unidade Espesiél Polísia (UEP), Bairru-Pité, Kuarta (22/12/21). Foto/Hatutan.com.

“Membru PNTL sei garante katak, festeza loron boot ne’e la’o ho di’ak la’ós membru sira mak involve iha aktu balun, liu-liu molok hala’o atividade, konsumu uluk alkól. Ida ne’e sei la autoriza,” Komandante Jerál PNTL, Komisáriu Polísia, Faustino da Costa, hateten durante hala’o parada iha Kuartél Unidade Espesiél Polísia (UEP), Bairru-Pité, Kuarta (22/12/21).

Notisia iha Relasaun:OJE 2022, PN Aprova Millaun $34 ba PNTL

Faustino husu membru tomak atu hatudu nafatin karáter nu’udár belun,  hodi hala’o kna’ar ho responsabilidade profisionál.

Durante membru sira asegura loron boot, bainhira iha nesesidade urjénsia ruma, tenke husu autorizasaun ba Komandante sira iha kada komandu munisípiu, hodi iha koñesimentu molok dezloka ba vizita familia iha munisipiu, postu administrativu no suku sira.

Komisáriu Polisia, Faustino da Costa, Orienta ona komandante munisipiu sira no komandante seksaun sira atu kontinua halo koordenasaun di’ak ho parte relevante sira, liu-liu lideransa komunitária, autoridade komunitária sira no autoridade relijioza sira, liu-liu Igreja Katólika kona-bá preparasaun ba selebrasaun loron natál no tinan foun ninian.

Oras ne’e daudaun, membru sira iha instituisaun PNTL hamutuk 4.089.  

Jornalista: Rogério Cárceres