Lanu To’o Atu Sunu Uma, TDD Aplika Aprezentasaun Periódika

Hatutan.com, (04 Janeiru 2022) Díli– Tribunal Distritál Díli (TDD), liuhusi desizaun Juiza Albertina Neves, Tersa (04/01/2022), aplika medida koasaun aprezentasaun periódika ba arguidu JAP ba nia aktu atu sunu lezada DA nia uma iha Bemori, Díli.

Tribunál Distritál Díli (TDD). Foto/Hatutan.com

JAP ho arrogánsia tanba lanu-todan  iha kalan simu tinan foun, 31 Dezembru 2021, lori gazolina fakar ba lezada nia uma atu sunu.

Parte Defeza  Sebastião Amado konkorda ho medida koasaun ne’e, tanba adekuadu ba nia kliente, liu-liu Tribunál konsidera arguidu nia kooperasaun hodi konfesa no iha intensaun di’ak hakarak husu deskulpa ba lezada tanba momentu ne’ebá ho kondisaun lanu.

Tribunál esplika medida koasaun aprezentasaun periódika ne’e,  arguidu hela de’it iha uma, maibé kada semana arguidu tenke aprezenta aan iha Postu Polísia ne’ebé besik.

Razaun Tribunál aplika medida koasaun ne’e, tanba konsidera iha indísiu forte, maibé arguidu koopera di’ak ho Tribunál hodi konfesa no iha intensaun di’ak hakarak husu deskulpa ba lezada.

Iha primeiru interrogatóriu ne’e, Ministériu Públiku ne’ebé reprezenta husi Prokuradór Renato Berenahak promove arguidu ba krime inséndiu ne’ebé previstu iha artigu 263 husi kódigu penal Timor-Leste.

Iha kalan 31 Dezembru 2021, arguidu ho kondisaun lanu fakar gazolina  hale’u lezada nia uma ne’ebé lokaliza iha área Bemori, maibé la konsege sunu ho eskeru tanba lezada hadau no baku sai eskeru husi arguidu nia liman.

Polísia Sientífika Investigasaun Kriminál (PCIC, sigla portugés) kumpre mandadu detensaun husi Tribunál hodi detein arguidu hafoin submete ba primeiru interrogatóriu.

Jornalista: Carmelita Isaac