CAC Halo Buska Apreensaun ba Emprezáriu no Adjuntu Prezidente Autoridade RAEOA

Hatutan.com (18 Janeiru 2022) Díli—Ekipa Investigadór Comissåo Anti-Corrupcão (CAC) nian lidera hosi Diretór Investiasaun Kriminál (UIK), Emílio Quintas, akompaña hosi Polísia Nasionál Servisu Investigasaun Kriminál (PNSIK) Nasionál, Tresa (18/1) ezekuta no asegura mandadu Tribunál Rejiaun Administrativa Espesial Oecusse Ambeno (RAEOA) ho númeru NUC 0057/21.PDOEC loron 17/12/2021.

Rotunda Sikluli, RAEOA. Foto/CAC

Mandadu ne’e fó podér mai investigadór CAC hodi halo operasaun buska no apreensaun ba suspeitu diretór emprezáriu na’in-ida (1) hanesan mós subriñu hosi suspeitu seluk nu’udár Jerente Seniór RAEOA/ZEESM ka Adjuntu Prezioidente Autoridade ho inisiál MN ho ninia espoza (co-autór ne’ebé posibilidade bele sai suspeitu), tanba diskonfia envolve iha kazu krimi korrupsaun.

Mandadu ba buska iha domisiliáriu no prende sasan ne’e, juiz haruka no fo órden atu halo buska iha domisiliáriu ho posibilidade ba prende sasan ne’ebé mak iha ligasaun ho faktus hirak ne’ebé investiga ona, tuir dispozisaun iha art 37 no nú 2, hosi KRTL, iha artigu 226 no 1, al. c) artigu 108 no 1 artigu 170, hotu-hotu hosi KPP ba suspeitu ninian hela fatin.

“Órden ba halo buska ne’e konsede iha auto inkéritu nian NUC S (ic.NUCNo), hosi ne’ebé investiga daudaun hela suspeitu kona-bá auto krime, p.p hosi artigu kódigu penál nian,” Hatutan sita komunikadu.

Ba kumprimentu efetivu ba mandadu ida-ne’e, iha autorizasaun ba asesu iha dependénsia hotu-hotu, inklui kofre, fatin hirak rai sasan nian, veíkulu hirak ne’ebé uza hosi suspeitu, bele fera odamatan, hakat sai hosi moru no neutraliza animál sira, se presija duni, ho observánsia ba dispozisaun iha artigu 169 no 170 hosi KPPTL. 

Operasaun loron ohin, ekipa investigadór CAC nian hala’o iha Zonas Espesiais de Economia Social de Mercado de Timor-Leste, tanba iha indisius forte arguidu sira komete kazu krimi brakamentu kapitais (artigu 313 Kódigu Prosesu Penál Timor-Leste KPPTL), kazu krimi korrupsaun pasiva no krimi korrupsaun aktiva akontese iha área juridiksaun RAEOA Oecusse nian.

Operasaun buska no apreensaun ida-ne’e dahuluk liu CAC hala’o iha munisípiu sai hosi kapitál Díli iha istória CAC nian hafoin estabelese no operasiona iha tinan 2010 liu ba bazeia ba mandatu Lei Númeru 8/2009 15 Jullu.

Kazu ne’e rasik hetan delegasaun kompeténsia hosi Prokuradór Distritál Oecusse hodi investigadór CAC sira iha podér lei halo prosesu investigasaun ho kuidadozu hanesan rona sasin sira, halibur dokumentus no halo survelénsia ba iha intervenenti prosesuál liu-liu arguidu nian  bens sira.

Iha prosesu investigasaun naruk nian laran ne’e, revela indisius krimi forte hodi halo promosaun ba buska domisiliáriu hatu’ur iha arto 170 KPPTL no apreensaun arto 172 KPPTL ne’ebé realiza Tersa-feira (18/1) ohin iha arguidu ninian rezidénsia Sikluli, Pante Makassar.

Investigadór CAC sira sei halo investigasaun kle’an liu tán hodi rekolla informasaun, evidénsias balun mensiona iha karta mandadu buska no apreensaun ne’e atu revela verdade.

Iha operasaun buska domisiliária no apreensaun loron ohin nian, investigadór CAC konsege halibur dokumentus lubun boot; konta bankária, osan cash ho montante boot, dokumentus kompañia nian, telefone no dokumentus sobre projeitu eletrifikasaun, no projetu balun iha RAEOA/ZEEMS ne’ebé suspeitu ho ninian espoza nian kompañia manán nu’udár evidénsia no objetivu krimi. 

Operasaun ne’e hetan akompañamentu direta hosi prokuradór titulár no Juiz ne’ebé hatun mandadu buska no apreensaun Yudi Pamungkas.

Jornalista: Carmelita Isaac