Servisu Informasaun Polísia Kaptura Suspeitu Ne’ebé Oho Núncio Pinto iha Masin-lidun

Hatutan.com, (31 Janeiru 2022), Díli—Polísia Nasionál Timor-Leste (PNTL), Komandu Munisípiu Díli, liu hosi Servisu Informasaun Polísia (SIP) ho Servisu Informasaun Militár (SIM), hosi FALINTIL Forsa Defeza Timor-Leste (F’FDTL), kaptura ona Supeitu JdD, ne’ebé deskonfia sona-mate (oho) Nuncio Calistro Pinto Soares, iha área Maslidun, aldeia 12 de Outubro, Suku Comoro, Postu Administrativu Dom Aleixo, Munisípiu Díli.

Polísia akompaña supeitu JdD, ne’ebé deskonfia sona-mate (oho) Nuncio Calistro Pinto Soares, iha área Maslidun. Foto/PNTL.

Xefe ekipa operasaun Servisu Informasaun Polisia (SIP), Asistente Inspetór Polisia, Nelson Herculano, informa, ekipa operasaun konjunta, konsege kaptura suspeitu JdD, iha nia rezidénsia Ai-mutin, Comoro-Dili, iha Domingu, 30 Janeiru tuku 7:00 otl.

“Ekipa konjunta kaptura ona suspeitu ho inisial JD alias AB ne’ebé halai sees hosi lokál do krime mai iha Ai-mutin, tanba komete kazu omesídiu ne’ebé hamate Nuncio Soares, iha área Tasi Tolu iha tuku-haat dadeer,” Hatutan.com  sita deklarasaun Xefe ekipa operasaun SIP, Asistente Inspetór Polísia, Nelson Herculano iha  komunikadu.

Tuir kronolójia, iha Domingu 30 Janeiru 2022, maizumenus tuku 04:18 otl, mosu kazu omesídiu ida iha área Tasi-tolu (Masin-lidun), aldeia 12 de Outubro, Suku Comoro, Postu Administrativu Dom Aleixo.

Akontesimentu ne’e mosu tanba, iha Sábadu 29 Janeiru oras kalan, parte hosi suspeitu ho vítima, partisipa hotu iha festa koremetan ida iha Masin-lidun.

Durante serimónia ne’e, to’o iha Domingu tuku 04:18 oras madrugada, vitima Núncio Soares hetan sona hosi suspeitu JdD, iha tenda laran, hosi vitima nia liman sorin karuk parte knosen nian.

“Tuir kronolójia hosi festa na’in deklara katak, bainhira múzika lian no sira dansa ho Mário Bikan, hanesan grupu organizasaun Kera Sakti, ho nia grupu dansa tama ba tenda laran. Nune’e, mosu kedan problema. José de Deus (Aje Volante), hosi tenda liur, hakat tama ba iha tenda laran, hodi hamosu konfrontu no José Volante, hodi tebe matebian no suspeitu ho suspeitu ida tán, Moises mak uza tudik hodi sona matebian ho naran, Nuncio Soares (Ameta) no Ameta rasik, halai sai hosi tenda ba kuartu laran, maibé rán suli makas no parte familia evakua ho karreta truck, maibé la konsege salva nia vida,” Inspetór Polisia, Herculano, konta-tuir.

Informasaun seluk ne’ebé servisu sekreta sira hosi PNTL ho F-FDTL nian, rekolla iha terrenu katak, Suspeitu JdD (AV), envolve iha grupu artes rituais 77 no hafoin sona vítima, suspeitu halai sees hosi lokál krime, maibé ikus-mai konsege kaptura.

Nune’e ho kapturasaun ne’e, ekipa Servisu Informasaun Polísia (SIP) no Servisu Informasaun Militár (SIM), entrega kedan ona ba Polísia Nasionál Servisu Investigasaun Kriminál (PNSIK), hodi kontinua prosesu investigasaun.

Suspeitu JdD (37), oríjen hosi munisipiu Ermera, Suku Baboe Leten, Postu Administrativu Atsabe, Munisipiu Ermera.

Vítima ne’ebé hetan oho hosi suspeitu JdD, mak Nuncio Calistro Pinto Soares  (23). Matebin orijen hosi Atambua-Indonézia no iha Díli hela fatin iha área Masin-lidun, aldeia 12 de Outubro.

Oras ne’e kazu ne’e submete ona ba prosesu investigasaun.

Jornalista: Rogério Pereira Cárceres