Komandu PNTL Husu Públiku Keixa Membru Ne’ebé Fasilita Joven Tuda-malu

Hatutan.com, (03 Janeiru 2022), Díli—Komandu Polísia Nasionál Timor-Leste (PNTL), liuhosi Komandante Munisípiu Díli, Superintendente Xefe Polísia, Hendrique da Costa, husu ba públiku atu halo keixa ba Komandu, hodi prosesa membru ne’ebé deskonfia fasilita joven sira tuda-malu iha kapitál Díli.

Komandante Munisípiu Díli, Superintendente Xefe Polísia, Hendrique da Costa. Foto/Hatutan.com.

Superintendente Xefe Polísia, Hendrique da Costa husu ne’e relasiona ho akontesimentu insidente iha Tersa 01 Janeiru 2022, tuku-tolu liu oras lorokraik, joven sira hosi Grupu Arte Marsial (GAM), Ikatan Kera Sakti (IKS), hasoru Grupu Arte Rituál (GAR) Sete-sete (77), hodi hamosu konfrontasaun iha fatin lima diferente.

Notisia iha Relasaun:PNTL Detein Membru IKS ho 77 Na’in-28 no Halo Apreensaun Ba Motór 10-resin

Hosi konfrontu ne’ebé akontese entre joven sira ne’e, komunidade balun ne’ebé observa situasaun ne’e halo mós gravasun vídeo iha fatin-fatin.

Hosi vídeo sira ne’ebé virál iha média sosiál no WhatsApp,  hatudu katak, tuda malu ne’e aontese iha área Fatuhada, deskonfia membru PNTL ida ne’ebé halo hela atuasaun iha terrenu, no fó hela “instrusaun” ba joven sira atu tuda-malu.

“Ha’u husu ba ita-boot sira, labele fiar diretamente filmájen ne’ebé mak la’o. Agora teknolojia modernu ne’e ema bele edita buat tun-sa’e. Bele hato’o keixa atu ita loke prosesu,” Komandante Munisipiu Díli, Superintendente Xefe Polísia, Hendrique da Costa, hateten ba jornalista-sira, iha kna’ar fatin, Komandu Caicoli, Kinta (03/02/2022).

Bainhira iha ona keixa ruma, PNTL liuhosi ekipa investigadór-sira iha Departamentu Justisa, sei halo prosesu, tanba liuhosi prosesu investigasaun mak bele deskobre ninia motivu sira.

Nu’udár komandante munisípiu Dili, Superintendente Xefe Polisia, Hendrique da Costa, seidauk bele halo akuzasaun ba membru-sira, bainhira la liu hosi investigasaun ruma.

Durante ne’e, nia membru sira hala’o hela servisu maka’as ona iha terrenu, laiha tempu ba deskansa, tanba atu atende de’it situasaun krime sira.

“Ha’u rezeita tanba seidauk iha prosesu. Bele iha keixa mós tenke liuhosi prosesu atu bele deside katak ema ne’e sala,” nia hateten.

Iha sorin seluk, Komandante Jerál PNTL, Komisáriu Polísia, Faustino da Costa dehan, departamentu justisa PNTL, maki ha kompeténsia atu halo prosesu identifikasaun.

“Ha’u seidauk julga iha momentu ida ne’e, ida ne’e ita iha hela ekipa ida hodi halo prosesu ba ida ne’e,” Komisáriu Polisia, Faustino da Costa, hateten.

Kona-bá membru IKS ho Sete-sete (77), ne’ebé detein iha sela detensaun Komandu Munisipiu, iha tempu badak sei aprezenta hotu ba iha Ministériu Públiku (MP).

Jornalista: Rogério Pereira Cárceres