Yohan Termina Kurida Winter Olympic ho Pozisaun 45

Hatutan.com, (17 Fevereiru 2022), Díli- Atleta ski Timor Leste, Yohan Goutt Gonçalves, termina nia kurida iha winter olympic iha kategoria Slalom beijing, Cina iha pozisaun 45.

Notísia iha Relasaun: Atleta Ski Yohan Goutt Gonçalves Falla iha Klase Giant Slalom Beijing

Atleta ski Timor Leste, Yohan Goutt Gonçalves. Foto/Dok.Yohan

Iha klase Slalom winter olympic Beijing ne’ebé hala’o iha Kuarta (16/02/2022), partisipa husi atleta 88 husi nasaun hamutuk  84 no klase Slalom. Atleta sira iha oportunidade atu halo kurida dala-rua no Yohan Goutt Gonçalves rasik finaliza ninia kurida iha ronde rua ne’e ho di’ak maske la konsege rekolla vitória ba Timor Leste.

“Iha primeira ho segunda kurida loron ohin nian, Yohan kurida di’ak maske ita la hetan vitória,” hateten sekretáriu jerál Federasaun Ski Timor Leste, Luis de Sousa Sequeira ba Hatutan.com via WhatsApp, Kinta (17/02/2022).

Federasaun Ski timor Leste iha hela hanoin oinsá atu halo komunikasaun ho maluk timoroan sira  ne’ebé hela iha Europa, karik sira nia-oan hakarak hahú treinu ski tamba Yohan tinan hirak tan para ona no  presiza iha atleta foun atu kontinua reprezenta Timor Leste iha eventu internasional no rejionál sira.

“ita tenke haree fali labarik sira ne’ebé mak hakarak ski atu hahu treinu,” nia Sublina.

Hafoin jogu Yohan Goutt Gonçalves haruka mensajen WhatsApp ba sekretáriu jerál Ski Timor Leste hateten, nia kontente no orgullu bele reprezenta Timor Leste iha kurida ne’e, obrigadu ba korajen no enerjia hotu ne’ebé Timor Leste oferese.

“Obrigadu barak ba suporta husi imi hotu. Ha’u kontente bele reprezenta ita-nia rai Timor-Leste iha eventu internasional ne’e. Onra boot ida ba ha’u. Obrigado mós ba imi hotu nia mensajen no enerjia fó mai ha’u durante ha’u nia kurida. Viva Timor-Leste!,” Yohan Goutt Gonçalves hateten.

Atleta ho idade 27 kompleta ona nia kurida iha winter olympic ba iha kategoria slalom no Giant Slalom iha olimpiade Beijing, Xina no konsege hatudu prestasaun hodi okupa pozisaun 45 iha kategoria Slalom.

Jornalista: Vito Salvador