Lei MPCC Obriga Ajente Públiku Deklara Rikusoin

Hatutan.com (01 Marsu 2022), Díli—Ejizénsia Lei Númeru 7/2020 Medidas Prevensaun no Kombate Korrupsaun (MPCC) katak la iha ona tempu ba servidór Estadu atu diskute no halo negosiasaun kona-bá deklarasaun rikusoin nian.

Komisáriu Comissão Anti-Corrupção (CAC), Sérgio Hornai. Foto/CAC.

Agora tempu ona atu ajente públiku sira obrigatoriamente tenke kumpre de’it ba lei MPCC, hodi deklara nia rikusoin iha CAC no Tribunál Rekursu (TR).

Notisia iha Relasaun:CAC Ofisialmente Utiliza Sistema Plataforma Online bá Deklarasaun Riku-soin

Komisáriu Comissão Anti-Corrupção (CAC), Sérgio Hornai ko’alia asuntu ne’e ba dirijente no funsionáriu sira iha Ministériu Saude (MS) bainhira hamutuk ho Komisáriu Adjuntu Luis Sampaio no ekipa tékniku DRBI kumpre konvite Ministra Saúde nian ba halo aprezentasaun Sistema Plataforma online kona-bá Deklarasaun Rendimentu, Bens no Interese (DRBI) iha edifísiu Palásiu Sinzas, Caicoli, Tersa (01/03/2022).

“La iha ona tempu ita atu diskute, ne’e lei ita tenke kumpre. Ita boot ho ha’u komprimenta de’it ba lei ne’e. Deklara ita boot nian mai CAC, no ha’u sei deklara ba Tribunál Rekursu. La iha tán negosiasaun, la iha tán buat seluk, ne’e atu ko’alia manggame oitoan hanesan ne’e,” Sérgio Hornai ko’alia ba partisipante sira.

Tuir nia, laiha ona tempu atu  halo diskusaun kona-bá Lei, maibé iha de’it tempu atu halo aplikasaun ba Lei.

“Iha tempu ruma mak ita halo fali diagnostika ruma hodi reatualiza. Agora ita husik la’o, to’o tinan lima mai ita avalia, nia vantajen no desvantajen iha ne’ebé no ita sei bele halo melloramentu,” Komisáriu ne’e subliña.

Iha 14 maiu 2021, CAC hasai notifikasaun iha nível Ministériu, Sekretária Estadu to’o autoridade munisipál hamtuk 66, hato’o mós notifikasaun ba instituisaun autónoma 25 ba prosesu arrolamentu ne’e, hodi deklara riku soin.

Lei numeru 7/2020, 26 agostu kona-bá Medida Prevensaun no Kombate Korrupsaun (MPCC), tama ona iha vigór, iha 22 fevereiru 2021.

Lei MPCC prevee iha kapitulu II Regime de Declaraçao de Rendimentos, Bens e Interesses hosi artigu 27 to’o artigu 58.

Notisia iha Relasaun:CAC Kontinua Sensibiliza Lei MPCC iha Aileu

Jornalista: Carmelita Isaac