Assanami Promete iha Aileu Sei Dignifika Lutadór, Oan-ki’ak no Faluk sira

Hatutan.com, (02 Marsu 2022), Díli— Kandidatu Pezidente Repúblika períudu 2022 to’o 2027 ho númeru sorteiu 16, Mariano Assanami Sabino promete katak, bainhira eleitu nu’udár Xefe Estadu sei dignifika lutadór sira, oan-ki’ak no faluk sira.

Kandidatu Pezidente Repúblika períudu 2022 to’o 2027 ho númeru sorteiu 16, Mariano Assanami Sabino hala’o kampaña abertura iha Kampu futeból Aileu-Vila, Tersa (02/03/2022). Foto/Média Kandidatu Assanami.

Komromissu politika ne’e Asanami hato’o durante kampaña abertura perante apoiante iha Kampu futeból Aileu-Vila, Tersa (02/03/2022). 

Notisia iha Relasaun:Armanda Berta Hakarak Sai Xefe Estadu Ne’ebé Hametin Identidade Kulturál

Kandidatu Assanami hili Aileu hodi halo abertura kampaña eleitorál, tanba reinsurisaun militár FALINTIL hodi luta ba libertasaun nasionál hahú iha fatin ne’e, inklui hakarak atu fó omenájen ba erói boot Francisco Xavier do Amaral ho Prezidente Nicolau Lobato.

“Ha’u hili Aileu tanba sai testemuña ba terus no susar iha luta libertasaun nasionál, tanba ema lubuk ida mate no hetan turturasaun iha ne’e. Hanesan jerasaun foun ne’ebé sai mós mate restu ha’u hakarak sai Prezidente Repúblika hodi dignifika lutadór sira, liu-liu oan ki’ak no faluk sira,” Assanami hateten iha ninia diskursu polítiku,  ne’ebé transmite direta hosi pájina ofisiál média sosiál apoiu Asanami ba Prezidente Repúblika.

Assanami mós kompromete bainhira eleitu sai Prezidente Repúblika, sei halo orientasaun polítika jerál ida hodi bele garantia bem estár povu no nasaun nian iha futuru.

Kandidatu ne’e hatene didiak katak, Prezidente Repúblika mak sai hanesan símbolu nasionál, hodi garantia funsionamentu instituisaun demokrátiku sira hodi haknar aan tuir de’it konstituisaun, labele halo interpretasaun mesa-mesak ba konstituisaun hodi afavór ba ninia grupu partidária.

“Prezidente Repúblika ne’e responsabiliza ba politika jerál Estadu atu leno aan ba bem estar povu nian,” nia hateten.

Governasaun ida mosu PR mak nomeia no fó pose ba Primeiru Ministru no instituisaun independente sira, Xefe Estadu mak garantia sira nia funsionamentu, atu ida-idak bele haknar aan ho separasaun podér ne’ebé iha, maibé interdependénsia ba malu.

Prezidente Repúblika tenke promove diálogu nasionál oinsa ko’alia ba malu, hodi halo knaar iha instituisaun ida-idak maibé tenke koordena malu, tanba hotu-hotu leno an ba bem estar povu nian.

“Ohin loron bee moos, eletrisidade, saúde, eskola no sira seluk seidauk másimu PR tenke buka halo polítika oinsa atu bele koordena ho governu atu bele responde,” nia prometen tán.

Prezidente ne’e hanesan mós komandate supremu forsa armanda nian, tenke garantia hodi profesionaliza militár sira, maske ohin loron númeru militár ne’e sei ki’ik maibé oinsá sira bele iha kapasidade atu bele kontrola soberania ida ne’e.

Jerasaun foun ne’e mós ho nia kapasidade tomak, kompromete bainhira povu fó fiar eleitu sai Xefe Estadu sei promove Timor ba mundu no mundu mai Timor.

“Ita hakarak halo servisu diplomasia ida ne’ebé leno an ba interese rai laran nian, interese ekonomia rai laran nian,” nia hatutan.

Tuir Assanami nia haree katak,  ohin loron embaixada Timor nian loke ona iha fatin-fatin, embaixadór sira presiza esforsu halo servisu diplomasia ne’ebé di’ak dada investór sira mai investe iha rai laran, hodi hamoris ekonomia nune’e bele tulun emprega joven sira.

Iha fatin ne’e mós Assanami haree katak, setór agrikultura ne’e importante tebes, tenke tau atensaun másimu, muda ona agrikultura konvensionál ba modernu hodi garantia kuantidade produsaun.

Maski atu dezenvolve agrikultura ne’e kompeténsia governu nian, maibé PR sei haree no tentu hodi orienta governu atu bele fó prioridade ba setór importante ne’e.

Kampaña ne’e hetan observasaun direta hosi observadór nasionál, internasionál no hetan seguransa másimu hosi Polísia Nasionál Timor-Leste (PNTL).

Jornalista: Rogério Pereira Cárceres