Ministériu Públiku Husu Tribunál Obriga Kalbuadi Hela iha Uma

Hatutan.com (09 Marsu 2022), Díli—Ministériu Públiku (MP) liu hosi Prokuradór titulár Rog’erio Viegas, hatama ona pedidu ba Tribunál Distritál Díli (TDD) hodi husu aplika tán medida koasaun permanensia rezidénsia ka obrigasaun hela iha uma ba Francisco Kalbuadi Lay, ne’ebé previstu iha artigu 193 hosi kódigu prosesu penál, hodi asegura nia prezensa relasiona ho krime brankamentu kapitál.

Francisco Kalbuadi Lay partisipa iha konsolidasaun Partidu CNRT iha Díli. Foto/Espesiál.

Tuir informasaun ne’ebé Hatutan.com hetan hosi ofisiál TDD katak, parte TDD simu ona pedidu hosi MP inklui akuzasaun kona-bá kazu ne’e, maibé Tribunál seidauk bele deside tanba sei haree medida koasaun ne’ebé antes ne’e Tribunál foti ona.

Notisia iha Relasaun:MP Notifika Ona Francisco Kalbuadi Lay

Antes ne’e, TDD aplika ona medida koasaun Termu Identidade Rezidénsia (TIR) no proibisaun ba auzénsia, maibé MP deside hatama pedidu ne’e hodi asegura Francisco Kalbuadi Lay nia prezensa iha prosesu julgamentu.

Tuir ajenda TDD katak, iha loron 04 fulan Abrél sei hala’o primeiru julgamentu ba Francisco Kalbuadi Lay, relasiona ho krime brankamentu kapitál.

Iha loron 25 fulan Fevereiru liu hosi Prokuradór Rogério Viegas notifika ona Francisco Kalbuadi Lay hodi informa katak, prosesu investigasaun hosi MP remata ona no submete ona akuzasaun ba TDD.

Jornalista: Carmelita Isaac