Polítika
Kampaña Ikus, Alkatiri Garante Lú Olo Manan Maiória
Hatutan.com, (16 Marsu 2022), Díli- Sekretáriu Jerál partidu Frente Revolusionáriu Timor Leste Independente (FRETILIN), Mari Alkatiri, garante katak Kandidatu Prezidente Repúblika (PR), Francisco Guterres “Lú Olo” sei manan maiória iha eleisaun prezidensiál, 19 Marsu ne’e. Ho nune’e, husu militante no apoiante sira vota ho loos ba númeru 6.
Notísia iha Relasaun: PNTL Halo Apreensaun Ba Motór Estadu Ida Tuir Kampaña Kandidatu PR Lú Olo
Sekretáriu Jerál partidu FRETILIN, Mari Alkatiri. Foto/Hatutan.com
Sekretáriu Jerál partidu FRETILIN, Mari Alkatiri ba militante no apoiante sira iha kampaña ikus kandidatu PR Lú Olo iha Tasi Tolu, Díli, Kuarta (16/03/2022), hateten FRETILIN hamutuk ho nia aliadu sira hakarak lori hikas Lú Olo ba Prezidente Repúblika atu tau Estadu ida ne’e tuir Konstituisaun no lei sira hodi respeita ba dignidade povu nian.
“Ha’u hakarak aviza ba camarada sira bainhira ba vota keta haluha vota ba númeru neen (6),” Mari Alkatiri hateten.
Tuir nia, FRETILIN nia liadu mak povu no ida-ne’e mak estratezia foun ne’ebé FRETILIN iha atu liberta povu husi kiak no mukit hodi lori justisa ba rai-ne’e atu kombate korrupsaun.
Alkatiri saliente Lú Olo manan tiha ona molok vota tamba ne’e militante no apoiantes tomak mantein vizilansia atu labele monu ba adversariu polítika sira, atu nune’e, loron eleisaun to’o ba vota ba numeru neen (6).
Iha fatin hanesan Francisco Guterres “Lú Olo” hateten, vitória FRETILIN ho nia aliadu polítika sira hetan ona, tanba ne’e, militante no apoiante sira tenke ba vota atu lori nia fila hikas ba palasiu aitarak laran ba dala-rua hodi mantein estabilidade nasionál no sai Prezidente Repúblika ba povu tomak.
“Ha’u sei respeita prinsípiu separasaun de poder no garante interdependénsia entre orgaun soberanu sira ne’e atu lori dezenvolvimentu ba oin,” Francisco Guterres Lú Olo hateten.
Lú Olo mos promete atu nafatin mantein servisu hamutuk ho órgaun soberanu sira seluk hodi hadia ekonomia povu nian ne’ebé sustentabel no harahun korrupsaun iha instituisaun Estadu sira no hametin instituisaun FALINTIL-Forsa Defeza Timor Leste (F-FDTL) atu sai profesional.
“Ha’u hatene atu halo servisu no servisu hamutuk ho órgaun soberanu hotu hodi hadi’a imajen Timor Leste iha mundu internasionál,” Lú Olo tenik.
Hafoin komisu publiku ne’ebé halao iha Tasi Tolu Díli mosu konfrontu entre militante partidu FRETILIN iha areadores uma adat no PNTL konsege atúa no kaptura militante balun ne’ebé deskonfia provoka situasaun iha ámbitu kampaña ikus kandidatu PR Lú Olo nian ne’e.
Jornalista: Vito Salvador