Timoroan Ida Mate iha Inglaterra, Família Husu Tulun Atu Lori Mate-isin Mai Timor

Hatutan.com, (19 Marsu 2022), Dili-Traballadora timoroan, Cidália Bento ne’ebé mate iha Inglaterra, 09 fulan-Marsu 2022, to’o agora nia isin-mate seidauk bele halo transladasaun mai Timor-Leste tanba família enfrenta obstákulu iha kbiit finanseiru. Nune’e, família husu tulun no laran luak Timoroan hotu nian, atu bele ajuda fasilita prosesu lori hikas mate-isin Cidália nian mai nia rai moris fatin, Venilale, Baucau. 

Notísia iha Relasaun: Mate-isin Traballadór Timoroan Husi Korea Súl To’o Ona Iha Dili

Matebian Cidália Bento ne’ebé mate iha Inglaterra. Foto/Espesiál

Informasaun ne’ebé Hatutan.com simu husi traballadór timoroan sira ne’ebé agora iha Inglaterra akompaña ka hadera mate-isin Cidália nian katak, sira nia parte forma ona ekipa hodi bele buka tulun-malu no husu tan apoiu husi maluk timoroan hotu iha Inglaterra ho Norte Irlanda atu bele ajuda soe hamutuk osan oituan-oituan hodi fasilita transladasaun isin-mate Cidália Bento nian bele mai Timor iha tempu badak atu bele lori ba haloot iha nia knu’a moris fatin iha Postu Administrativu Venilale, Munisípiu Baucau.

Ekipa ne’ebé estabelese ne’e utiliza mós meius rede sosiál Facebook hodi  hato’o lia rekadu ba maluk timoroan hotu iha Inglaterra ho fatin sira besik Inglaterra atu bele ajuda osan ba tulun prosesu transladasaun insin-mate Cidália Bento ne’ebé mak mate iha Taunton Musgrove Hospital, Brigwater.

Matebian Cidália iha esperiénsia servisu iha Korea Súl kuaze tinan-haat nia laran no nia mai Timor hodi trata dokumentu hodi kontinua ba servisu fali iha Inglaterra husi tinan 2016 to’o 2017.

Tempu ne’ebá matebian Cidália hetan moras, nune’e fila fali mai Timor hodi halo tratamentu to’o nia rekupera. Nune’e, iha tinan 2020, matebian Cidália deside fila fali ba Inglaterra hodi servisu hadi’a kondisaun ekonomia família.

Iha loron 04 fulan-Marsu 2022, matebian Cidália hetan atake moras derrepente to’o labele salva nia vida. Matebian Cidália, antiga aluna Koléjiu Sekundária Canossa, Dili iha tinan 2005 ne’e husik hela oan feto na’in-tolu iha Timor no família husu laran-luak Timoroan hotu iha Inglaterra ho Norte Irlanda atu bele tulun lori fila matebian nia isin-mate mai rai moris fatin Venilale, Baucau.

Família matebian prepara ona kartaun bank iha ne’e maluk sira ne’ebé mak presiza manda osan-lilin nia bele manda mai iha Ermínia Soares, ho bank Halifax Account: 11399666 sort code : 11-00-92. Bele liga ba no 07391884881 atu bele hetan informasaun klaru liután.

Jornalista: Vito Salvador