Lú Olo Apresia Partisipasaun Povu iha Eleisaun Ba Prezidente Repúblika

Hatutan.com, (20 Marsu 2022), Dili-Kandidatu Prezidente Repúblika ho númeru sorteiu 6, Francisco Guterres “Lú Olo” apresia partisipasaun sidadaun hotu-hotu iha eleisaun ba Prezidente Repúblika, 19 fulan-Marsu ne’e, hodi  ezerse sira-nia direitu síviku hili sira-nia kandidatu sai Prezidente Repúblika ba períodu 2022-2027.

Notísia iha Relasaun: Ramos-Horta “Dudu-sees” Lú Olo ho Alkatiri iha Sentru Votasaun EBC Farol

Kandidatu Prezidente Repúblika Francisco Guterres Lú Olo. Foto/Hatutan.com.

Liuhusi komunikadu ba  imprensa ne’ebé Hatutan.com asesu ekipa sira Kandidatu Lú Olo, Domingu (20/03/2022), haktuir Kandidatu Prezidente Repúblika Francisco Guterres “Lú Olo” kontente akompaña ho besik eleisaun ba Prezidente Repúblika iha Timor-Leste no iha rai-li’ur (Austrália, Portugal, Inglaterra, Norte Irlanda  ho Korea Súl) la’o ho hakmatek.

“Ne’e hatudu maturidade polítiku povu nian husi loron ba loron sa’e babeibeik,” Lú Olo hateten liuhusi komunikadu ne’e.

Kandidatu Lú Olo apresia serbisu sira husi órgaun eleitorál Sekretáriu Tékniku Administrasaun Eleitorál (STAE) no Comissão Nacional de Eleições (CNE), ne’ebé organiza no halo supervizaun ba eleisaun Prezidente Repúblika atu sidadaun hotu-hotu bele ezerse ninia direitu ba tuir votasaun.

“Sidadaun ida-idak ezerse ona ninia direitu ba vota, ita hotu akompaña hela prosesu kontajen votu nian,” Lú Olo tenik hodi husu mós atu timoroan hotu-hotu bele tuir kontajen votu no fó fiar tomak ba órgaun eleitorál sira ezerse sira-nia funsaun ba kontajen votu no apuramentu to’o entrega rezultadu ikus ba Tribunál Rekursu no Tribunal Rekursu mak sei anunsia rezultadu finál ba eleisaun Prezidente Repúblika.

Kandidatu Lú Olo apela ba STAE atu haree problema sira iha eleisaun ba Prezidente Repúblika nian ne’e nudár lisaun atu bele organiza di’ak liután sentru votasaun paralelu sira iha Dili hodi garante direitu votu ba sidadaun hotu-hotu iha eleisaun sira iha tempu tuir mai.

Jornalista: Vito Salvadór