Prezidente Repúblika Preokupa Timoroan Barak La Vota

Hatutan.com, (22 Marsu 2022), Díli- Prezidente Repúblika, Francisco Guterres “Lú Olo”, preokupa ho timoroan  barak la ba vota iha loron eleisaun  ba Prezidente Repúblika iha 19 Marsu ne’e.

Notísia iha Relasaun: Lú Olo Rejeita “Derrota” iha Primeira Ronde Eleisaun ba PR

Prezidente Repúblika, Francisco Guterres “Lú Olo”. Foto/Hatutan.com

Prezidente Repúblika husu Governu liu husi órgaun eleitorál sira hadi’a sistema atendimentu hodi hasae tasa partisipasaun timoroan sira nian iha eleisaun segunda volta.

Francisco Guterres “Lú Olo” haree no akompaña rezultadu kontajen nasionál ne’ebé STAE konklui tiha ona hatudu momoos númeru eleitór sira ne’ebé la vota hamutuk 195,507 (22, 74%).

“Tasa partisipasaun menus porké ida-ne’e falla husi Governu ne’ebé halo ema barak la vota no presiza hadi’ak iha segunda volta eleisaun,” Francisco Guterres “Lú Olo”, hateten ba jornalista sira iha Palásiu Prezidensiál, Dili Tersa (22/03/2022).

Xefe Estadu husu atu órgaun eleitorál sira hanesan STAE no CNE tenke nafatin hadi’a sira-nia atendimentu públiku atu iha eleisaun segunda volta sidadaun sira bele ba vota hodi ezerse sira-nia devér síviku atu hili Xefe Estadu ne’ebé sei kondús povu no nasaun tuir mandatu Konstituisaun.

Jornalista: Vito Salvador