KHUNTO Propoin Ba Governu Aselera Lei Krime Sibernétika

Hatutan.com, (05 Abríl 2022), Dili-Bankada parlamentár husi Kmanek Haburas Unidade Nasionál Timoroan (KHUNTO) preokupa no lamentavel ho atitude sidadaun balun nian ne’ebé utiliza media sosiál Facebook insulta no trata lider nasionál sira.

Foto Ilustrasaun

“Iha média sosiál ne’e, sempre ho liafuan ne’ebé mak hanesan la edukativu. Ida ne’e, maizumenus halo nusa, sá tan ida kampaña ba eleisaun prezidensiál segunda ronde ne’e, entaun iha média sosiál ne’e, tetak malu ne’e la ho lingua ne’ebé mak edukativu, insultu malu mak nakonu iha ne’ebá. Afeta ba ita nia lideransa altu nível sira no ita nia aman funu na’in sira,” membru PN husi Bankada KHUNTO, Luis Roberto Amaral hateten, durante intervensaun iha plenária PN, Tersa (05/05/2022).

Ho fenómenu ne’e, bankada KHUNTO propoin ba Governu, liuhusi Ministériu Asuntu Parlamentár no Komunikasaun Sosiál (MAPKOMS) ho Sekretária Estadu Komunikasaun Sosiál (SEKOMS), atu hamosu dekretu lei ruma ka lei krime sibernétika  hodi atua ema sira ne’ebé falta respeitu hodi hakerek ka insulta lider nasionál sira liuhusi Facebook.

“Ita boot mós iha ne’ebá hanesan sekretáriu estadu ba iha komunikasaun sosiál ninian, ha’u hakarak husu nafatin kona-bá regulamentu ne’ebé atu regula ita-nia ema sira ne’ebé maka halo intervensaun.  Ida ne’e, governu mós presiza haree, tanba ha’u fiar katak, Estadu ida ne’e, Governu ida ne’e, ita moris ho regulamentu ruma, iha lei ruma nia okos. Ita labele halimar ho ita nia aman luta na’in sira ninia dignidade,” Deputadu Luis Roberto hateten.

Luis Roberto afirma, tuir loloos, jerasaun foun sira labele hasai liafuan aat ba lider nasionál sira, tanba liuhosi sira maka, ohin loron ema hotu bele ko’alia, bele la’o lívre, hodi harii tán partidu polítiku oioin. Maibé, sira ko’alia la respeita ba líder nasionál sira.

Ba kestaun ne’e, Sekretáriu Estadu Komunikasaun Sosiál (SEKOMS), Merício Juvinál dos Reis “Akara” hatán, esforsu balu mak durante ne’e Governu halo ona, tanba iha ona projetu lei númeru 35/IV  kona-bá Lei ba Radiodifuzaun, ne’ebé Governu aprezenta ona ba PN, atu diskute no halo votasaun iha jeneralidade.

“Lei radiodifuzaun ne’e mós parte ida atu hahú haree konteudu ne’ebé sai iha média konvensionál sira, rádiu no televizaun. Ha’u hanoin, lei ne’e importante, oras ida, ita boot sira (deputadu) atu halo votasaun ba ida-ne’e,” Sekretáriu Estadu Komunikasaun Sosiál (SEKOMS), Merício Juvinál dos Reis “Akara” hateten.

Alende ne’e, meiu seluk ne’ebé Governu presiza prepara tán maka, lei krime Sibernétika. Lei ida ne’e sei regula sidadaun sira ne’ebé utiliza liafuan aat hasoru ema seluk iha média sosiál.

Jornalista: Rogério  Cárceres