Lú Olo Agradese Ba Liquiça-oan Sira

Hatutan.com, (12 Abríl 2022), Liquiça– Kandidatu Prezidente Repúblika (PR) segunda volta  ho númeru sorteiu rua (2), Francisco Guterres “Lú Olo”, hato’o agradese ba Liquiça-oan sira tanba iha eleisaun primeira volta, 19 fulan-Marsu liubá, fó ona votu ba nia, hodi konsege hakat to’o iha segunda volta eleisaun prezidensiál ne’e.

Notísia iha Relasaun: Jenerál Reformadu TMR Kontinua Promete, Ba Dala Ida-Ne’e Fó Empregu Ba Universitáriu Hetan Valór Exelente

Apoiante Kandidatu PR Lú Olo husi Munisípiu Liquiça. Foto/Mídia Kandidatu PR Lú Olo

“Ha’u haksolok boot tebetebes ho povu ida Liquiça tanba iha primeira ronde, eleisaun ba Prezidente Repúblika, imi nia votu ne’ebé maka fó mai ha’u, tau hamutuk ho munisípiu sira seluk, lori ha’u ba segunda ronda,” Francisco Guterres “Lú Olo” hateten durante hato’o nia intervensaun polítika iha kampaña komísiu ne’ebé hala’o iha kampu futeból Liquiça, Tersa (12/04/2022).  

Lú Olo dehan, iha eleisaun segunda ronda ida-ne’e, nia kompete kedan ho José Ramos Horta ne’ebê mai ho nia apoiante boot, Kay Rala Xanana Gusmão, ne’ebé oras ne’e daudaun, sira-na’in rua mós la’o hodi halo kampaña iha fatin-fatin.

“Maibé, segunda ronda ida ne’e, halo doutór boot na’in-rua, preokupadu tebetebes, preokupa atu halakon iha eleisaun ida ne’e ho Lú Olo. Tanba sá? Tanba ha’u la mesak ona, ha’u mai ho partidu polítiku sira ne’ebé mak fó apoiu ba ha’u nia kandidatura, no lori sira nia militante rihun para atu fó apoiu ba ha’u iha segunda ronda ida ne’e,” Lú Olo hateten ho fiar aan.

Tuir Lú Olo, nia hanesan figura no kandidatu ida ne’ebé diferente ho lider boot seluk, ne’ebé mak presiza sama ema ida nia ulun-fatuk leten hodi to’o iha Lalehan.

Lú Olo la presiza sama nia maluk timor-oan sira atu bele kaer fitun ka atu kaer fulan.

Kandidatu PR Francisco Guterres “Lú Olo” halo kampaña iha Munisípiu Liquiça, 12 Abríl 2022. Foto/Media Kandidatu PR Lú Olo

“Ha’u hakarak atu ema baibain hanesan mós ho ha’u nia maluk timor-oan sira seluk. Simplesmente prezidente repúblika ne’e, responsabilidade mak boot. Maibé ha’u hakarak hosi ema baibain, hanesan mós ema sira seluk. Só Lú Olo mak defende valór Timor-Leste nian, só Lú Olo mak bele defende Estadu ida ne’e,” Lú Olo hateten.

Martinho Gusmão nudár vise Komisaun Polítika Nasionál Partidu Unidade Dezenvolvimentu Demokrátiku (CPN-PUDD) deklara ba PUDD iha Liquiça, katak tempu agora  tenke apoiu maka’as ba Kandidatu Lú Olo, tanba kandidatu Prezidente nia desizaun durante ne’e benefisia povu no juventude. Liuhusi promulga lei no dekretu ne’ebé VIII Governu prepara.

Koordenadór TORKA Herman Lopes deklara ofisiál no husu ba membru organizasaun TORKA iha territóriu Timor-Leste atu vota ba Lú Olo.

Koordenadór partidu FRETILIN Munisípiu Liquiça, Luís Lobato hateten komísiu iha Liquiça militante husi partidu FRETILIN, PLP, KHUNTO, OS VERDES TIMOR, UNIJMA-CPD RDTL, PUDD, TORKA, Grupu arte marsiál sira partisipa uitoan tanba militante no apoiante sira  partisipa diálogu iha Postu Maubara no Ulmera.

Tuir oráriu hosi Sekretariadu Tékniku ba Administrasaun Eleitorál (STAE) ho Comissão Nacional de Eleições (CNE) katak, iha kuarta, 13 Abríl ne’e, kandidatu PR Lú Olo sei hala’o diálogu ho populasaun sira iha Rejiaun Administrativa Espesiál Oé-Cusse Ambeno (RAEOA) ho Manatuto.

Jornalista: Rogério Pereira Cárceres