Jornalista: Felix Fernandes 

Hautan.com, (13 Novembru 2026) Díli– Komisaun Anti-Korrupsaun (CAC, sigla portugés, Sesta (13/11/2026),  prepara autos hodi entrega diretór ida husi Tribunál Rekrusu (TR) no Komisáriu ida husi Komisaun Funsaun Públika (CFP)  ne’ebé detein hela iha sela detensaun CAC nian iha Farol ba Ministeriu Publiku (MP) no kontinua ba prosesu Primeiru Interrogatóriu iha Tribunál Judisiál Primeira Instánsia Díli (TJPID).

Arguidu sira detein iha sela CAC. Foto/Espesiál

Diresaun Investigasaun (DI)  Komisaun Anti-Korrupsaun (CAC) ne’ebé lidera husi Diretór José Verdial, Tersa, foin lalais ne’e, hala’o operasaun fiskalizasaun koordenada ida iha área Balide, hodi deteta, kaptura no detein diretór ida husi Tribunál Rekursu no Komisáriu ida husi CFP utiliza sira-nia motorista  ho karreta Estadu nian transporta sira idaidak nia oan ba eskola.

Ekipa CAC nian lori motorista, diretór no komisáriu hamutuk ho karreta Estadu nian mai iha instalasaun iha esdifisiu CAC hodi halo identifikasaun no halibur esklaresimentu preliminar.

Komunikadu ofisial ne’ebé Hatutan.com asesu haktuir hafoin halo apuramentu faktus ho rigor, verifika no komprova katak motorista sira halao deit knar hodi kumpre ordem no instrusaun direta husi sira nia superior ierarkiku/titular de kargu sira, no sira la foti vantajen ka interese pesoal diretu ruma liu husi sira nia knar laboral ofisial no kontinua detein diretór  TR no komisáriu CAC  durante 72 oras nian laran.

Ba motorista sira nu’udar sub-ordinadu no kumpre deit superior sira nia instrusaun, liu husi despaxu Diretor Investigasaun Kriminal CAC José Verdial nian no konforme dispozisaun legal artigu 223 nu. 1 alinea c husi Kodigu Prosesu Penal (KPP,) orden kedas liberta imediata ba motoristas sira ne’e tamba la iha tan motivu ka nesesidade prosesual atu mantein sira nia detensaun, no viatura sira ne’e foti no entrega fali ba servisu  orijem. Auto de libertasaun sira aneksa ona no intrega hotu ba prosesu laran.   

Maske motorista sira hetan ona libertasaun tanba kumpre ordem servisu, investigasaun apura katak iha indisiu forte kona-bá desvio de finalidade no uzo illegal ba meius publiku husi titular de kargu/dirijente sira ne’ebé fó ordem ka autoriza uza karreta no motorista Estadu nian ba fins partikular no familiar-tula oan ba eskola.

Maske motorista sira hetan ona libertasaun tanba kumpre ordem servisu, investigasaun apura katak iha indisiu forte kona-bá  desvio de finalidade no uzu illegal ba meius publiku husi titular de kargu/dirijente sira ne’ebé fo ordem ka autoriza uza kareta no motoristas Estado nian ba fins partikular, familiar ka liur husi finalidade publiku nian.

Ho nune’e, dirijente sira halo violasaun grave ba lei; aktu viola frontalmente rejim juridiku ne’ebé previstu iha artigu 17 husi Dekretu Lei Nu. 8/2022, 9 de Novembro Regulamentu rejim juridiku uza viatura Estadu nian ne’ebé prohibio espesialmente uzu viatura ofisial ba deslokasaun natureza partikular, familiar, ka liur finalidade publiku nian.

Abuzo de poder no responsabilidade prinsipal; responsabilidade penal no disiplinar kona liubá titular de kargu ka dirijente ne’ebé uza sira nian poder hierarkiku hodi mobiliza motoristas no viaturas sira ne’ebé selu ho Orsamentu Jeral Estadu (OJE) ba interese privadu nian.

CAC Halo Pedidu ba iha Ministériu Publiku

Bazeia ba motivu no fundamentu legal sira iha leten, submete expediente prosesual kompletu ne’e ba Ministériu Publiku (MP) hodi husu; Juntada aos Autos; Hatama iha prosesu laran Auto de Inquerito, Auto de Identifikasaun, Auto de Apreensaun no Despacho de Libertasaun sira ne’ebé emite husi CAC.

Promosaun dilijensia addisional; Halo promosaun ba investigasaun no dilijensia sira ne’ebé foka ba responsabilidade penal husi titular de kargu sira [mandantes], tamba uza viatura no rekursu Estadu nian ba fins privadus enkuadra iha krimi Pekulatu ba Uzu [previstu no punivel husi artigu 298 Kodigo Penal] no infrasaun sira seluk ne’ebé ligadu ba jestaun riku-soin publiku.

Iha operasaun ne’e, investigador CAC nian mos kaptura no halo prosesu identifikasaun ba motoristas nain tolu [3] seluk ho aktu krimi hanesan. Hafoin halo identifikasaun no detein oras balun nian laran diretor investigasaun husik livre no suspeitu sira sei tuir prosesu normal.

Iha fatin hanesan ba diretor no komisáriu ne’e, hafoin halo prosesu identifikasaun, investigador CAC desidi hodi halo medida detensaun ba suspeitu na’in-rua [2] durante  oras 72  iha sela detensaun CAC Farol Dili tamba hahalok ne’ebé komete husi suspeitu sira priense elementu krimi ba Pekulatu de Uzu tuir artigu 83 Lei Nu. 7/2020 Medidas Prevensaun no Kombate Korrupsaun [MPCC].

“Estadu fó transporte bá kargu xefia sira atu utiliza ba iha fins interese Estadu  nian. Mais, iha realidade iha ekipa sira nia atividade fiskalizasaun deskobre katak ajente Estadu nian sira uliliza sira fila fali karreta Estadu tula fila fali sira  nia oan bá eskola. Entaun, ida-ne’e bá fins privadu,” Diretór Investigasaun CAC, José de Araújo Verdial aifrma iha komunikadu imprensa ne’e. (*)