Arguidu Hatama Sigaru Ilegál Simu Pena Suspensaun Tinan Tolu

Hatutan.com, (13 Abril 2022), Díli–Tribunál Distritál Díli (TDD) iha kuarta 13 fulan ne’e, liu hosi leitura sentensa ne’ebé deside hosi juiz kolektivu João Ribeiro, Maria Solana, Ana Paula Fonseca kondena arguidu Marcal Maia Soares ho pena prizaun tinan rua, no suspende tinan tolu, tanba hatama sigaru surya ilegál liu hosi Atapupu mai TL.

Sigaru Ilegal ne’ebe Polisia Preende iha area tasi Atapupu. Foto PNTL.

Aplikasaun pena suspensaun ne’e tanba bazeia ba sirkunstánsia hotu ne’ebé iha liu-liu arguidu koopera di’ak ho Tribunál hodi konfesa no rekoñese katak, nia hatama sigaru ilegál durante fulan tolu.

Notisia iha Relasaun:Sigaru Kontinua Tama Ilegál Hosi Fronteira

Maski Tribunál konsidera faktus provadu bazeia ba konviksaun arguidu nian katak nia la kontribui ba taxa.

Antes ne’e, tuir akuzasaun hosi Ministériu Públiku (MP) katak iha loron 15 fulan Marsu 2021, arguidu hanesan negosiante iha Liquiça, maibé arguidu transfere osan ho montante $6.000 liu hosi loja Sahabat ba konta bankária Toko Ria iha Atambua hodi sosa sigaru Surya 399 slop, Joker 660 slop.

Tanba ne’e, Toko Rig importa hikas sigaru ne’e liu hosi ema na’in-tolu ne’ebé la koñese liu hosi Atapupu via maritima ho Johnsson ba Carimbala, Postu Administrativu Maubara, Munisípiu Liquiça.

Iha loron 10 fulan Abril 2021, oras 14:00 meiodia, bainhira to’o iha Liquiça arguidu ba foti, maibé Polisia Maritima ne’ebé destakadu iha área ne’e prende arguidu no halo mós apreensaun ba sigaru ne’ebé arguidu hatama.

Tanba ne’e, MP akuza arguidu ba pratika krime kontra bandu ne’ebé previstu iha artigu 316 hosi kódigu penál TL.

Audiénsia julgamentu ne’e prezide hosi juiz kolektivu João Ribeiro, Maria Solana, Ana Paula Fonseca, MP reprezenta hosi Prokuradór Adérito Tilman no arguidu sira hetan asisténsia legál hosi Defensór Públiku Marçal Mascarinhas.

Jornalista: Carmelita Isaac