Prezidente Repúblika Promulga Dekretu-Lei Subsídiu Kombustível

Hatutan.com, (19 Abríl 2022), Díli— Prezidente Repúblika (PR), Francisco Guterres Lú Olo, promulga Dekretu-Lei kona-bá atribuisaun subsídiu ba operadores transporte rodaviáriu públiku, aéros, marítimu nasionais no adkirentes kombustível ba atividade agrikola no peskas.

Prezidente Repúblika, Francisco Guterres Lú Olo. Foto/Média PR.

Iha 13 Abril 2022, Konsellu Ministrus aprova Dekretu-Lei ne’e hodi hatan ba folin kombustivel ne’ebé sa’e tanba efeitu hosi funu iha Ukrania.

Lee Mós:Folin Kombustível iha Merkadu Nasionál Sa’e ba $1.26

Iha Dekretu-Lei ne’e hateten katak  situasaun  akontese iha Ukrania provoka aumentu substansiál folin baril petroleum,  folin kombustível sa’e makaas ba konsumidores  prejudika dezenvolvimentu atividade ekonómika País nian.

“Dekretu ne’e estabelese subsídiu finanseiru, ho natureza esesionál no tranzitória ho objetivu hamenus impaktu ekonómiku hosi folin kombustível ne’ebé sa’e, atribui ba operadores transportes públikus no ba adkirentes kombustíve destinadu ba atividades agríkola no piskatória,” Hatutan.com sita komunikadu hosi Palásiu Prezidensiál Nicolau Lobato, Díli, (19/04/2022)

Subsídiu sei atribui liuhusi voucher kombustível, ho montante korrespondente ho 100% hosi valor diferensa entre folin médiu hosi kombustível iha Dezembru 2021 no folin kombustivel ne’ebé aplika iha data emisaun voucher kombustível.

Ho voucher kombustivel ne’e se litru ida sa’e hosi $1 ba $1,25, governu sei fó subsídiu sentavus 25.

Jornalista: Vito Salvadór