Hatutan.com, (19 Abríl 2022), Díli—Rezultadu provizóriu Eleisaun bá Prezidente Repúblika segunda volta nian iha Austrália, hatudu katak kandidatu Prezidente Repúblika ho númeru sorteiu ida (1), José Manuel Ramos-Horta, manan Kandidatu Francisco Guterres “Lú Olo”.
Kandidatu Prezidente Repúblika (PR) ho númeru sorteiu ida (1), José Manuel Ramos Horta, vota iha Sentru Votasaun iha Sede Suku Metiaut, Díli, Tersa (19/04/2022). Foto/Hatutan.com
Rezultadu eleisaun provizória segunda volta nian husi sentru votasaun sira iha Austrália, hanesan Darwin, Melbourne no Sydney, hatudu Ramos-Horta hetan votu 184 no Lú Olo hela ho votu 130.
Total votante timoroan iha Austrália ne’ebé ejerse sira-nia direitu síviku iha eleisaun prezidensiál segunda volta ne’e hamutuk ema 314, nune’e sira na’in-184 votu bá Ramos-Horta no Lú Olo hetan votu 130.
Advertisement
Dadus ne’ebé Hatutan.com sita husi Agéncia de Noticias de Portugál LUSA katak persentajen votu provizóriu husi Austrália hatudu kandidatu Jose Ramos-Horta hetan 56,60% (votu 184) no Francisco Guterres “Lú Olo” hetan persentajen votu 41,40% (votu 130).
Iha eleisaun prezidensiál primeira volta, 19 fulan-Marsu 2022, Kandidatu Prezidente Repúblika José Manuel Ramos-Horta hetan votu husi Austrália 160 no Francisco Guterres “Lú Olo” hetan votu 99.
Iha eleisaun prezidensiál segunda volta ne’e, Ramos-Horta hetan apoiu másimu husi partidu CNRT ho lider karizmátiku Kay Rala Xanana Gusmão, Partidu Demokrátiku (PD), PUDD, PDRT, UDT ho mós organizasaun masa oioin, inklui movimentu rezisténsia sira seluk tan.
Rezultadu privizoriu husi Austrália ne’ebé sita husi LUSA
Ramos-Horta, nu’udár diplomata kalibre mundiál no Laureadu Nobel ba Pás nian, ne’ebé mós nu’udár Prezidente Repúblika períodu 2007-2012.
Ramos-Horta sempre hateten fatór determinante hodi motiva nia kandidatu fali ba Prezidente Repúblika períodu 2022-2027 atu restaura fali orden Konstitusionál ne’ebé tuir nia haree la’o naksalak ona durante mandatu Prezidente Repúblika Francisco Guterres “Lú Olo” nian.