PNTL Detein Autór Na’in-Rua Tenta Hapara Prosesu Kontajen Votu iha Macadique

Hatutan.com, (20 Abríl 2022), Díli—Polísia Nasionál Timor-Leste (PNTL), liuhosi Komandu Munisípiu Viqueque, iha Tersa 19 Abríl 2022, detein sidadaun mane na’in-rua, tanba sai hanesan autór ne’ebé halo tentativa atu hapara prosesu kontajen votu, iha sentru votasaun sede suku Macadique, Postu Administrativu Uatulari, Munisipiu Viqueque.

Portavós Komandu Jerál PNTL, Superintendente Xefe Polísia, Armando Monteiro.

Portavós Komandu Jerál PNTL, Superintendente Xefe Polísia, Armando Monteiro haktuir, akontesimentu ne’e mosu, bainhira prosesu votasaun hotu ona, no tama iha prosesu kontajen votu nian, maibé, mosu movimentu balun ne’ebé mak tenta atu halo impedimentu ba prosesu kontajen ida ne’e.

Lee mós: Ramos-Horta Manan Lú Olo iha Sentru Votasaun Ne’ebé Taur Matan Ruak Vota

Haree ba situasaun ne’e, iha ona tendénsia atu hamosu violénsia ka krime, nune’e prezidente sentru votasaun iha sede suku Macadique, husu ba autoridade seguransa atu bele halo intevensaun ruma.

Maibé, ho atuasaun hosi membru PNTL sira ne’e, ikus mai mosu mós reasaun maka’as hosi autór sira, hasoru pesoál seguransa sira, hodi rezulta mós karreta PNTL nian ida hetan estragus.

“Hosi ita nia intervensaun ida ne’e hetan reasaun, no PNTL ninia transporte ida mak estragus. Suspeitu na’in-rua kapturadu, agora submete hela prosesu iha komandu PNTL munisipiu Viqueque,” Portavós Komandu Jerál PNTL, Superintendente Xefe Polísia, Armando Monteiro informa ba jornalista sira, liuhosi konferénsia imprénsa iha kuartél jerál Caicoli, Kuarta (20/04/2022).

Iha Munisipiu Viqueque, mosu mós kazu violénsia doméstika ida, entre oan ho aman ne’ebé mak ho tentativa atu halo omesídiu.

Nune’e, parte familia husu tulun ba seguransa ne’ebé mak besik iha estasaun votu, hodi fó protesaun.

Situasaun ne’e, halo pániku ka hatauk mós brigada ho fiskais sira inklui observadór sira ne’ebé besik iha sentru votasaun laran, halai namkari. Maibé, ho medida prevensaun hosi PNTL, konsege kaptura autór sira.

Antes ne’e, iha segunda 18 Abríl 2022, maizumenus tuku 09 liu, mosu kazu insidente ida iha Suku Hera, mosu tentative hosi grupu balun ne’ebé mak halo tentativa hodi halo asaltu hasoru ofisiál STAE nian ida, iha sentru votasaun laran.

“Iha tentativa ida ne’ebé mak halo atakes ka asaltu ba ita nia polling staff ida, iha sentru votasaun ida. Ho kazu ida ne’e mós iha intervensaun, maibé vitima ninia transporte hetan estragus, no kazu sira ne’e hotu, agora submete ona ba prosesu investigasaun munisipiu Dili,” Komandante Armando informa.

Tuir dadus, durante periudu eleisaun prezidensiál segunda volta, Komandu Jerál PNTL rejista kazu asidente 20, maibé iha kazu iha fatál ka rezulta vitima lakon vida (mate).

Iha ámbitu seguransa ba eleisaun prezidensial segunda volta ne’e, Komandu Jerál PNTL koloka nia membru sira hotu, ba iha sentru votasaun sira hamutuk 1191, no estadu votu 1491 iha territóriu Timor-Leste laran tomak.

Jornalista: Rogério Pereira Cárceres