EUA Kongratula Prezidente Eleitu José Ramos-Horta

Hatutan.com, (22 Abríl 2022), Díli–Portavós Ministériu Negósiu Estranjeiru Estadu Unidu Amerika (EUA), Ned Price, hato’o kongratulasaun bá  prezidente eleitu, José Manuel Ramos-Horta  ba ninia vitória hanesan prezidente Timor-Leste períodu 2022-2027.

Lee Mós : Embaixadór Sira Husi ASEAN Parabéniza Prezidente Eleitu José Ramos-Horta

Portavós Ministériu Negósiu Estranjeiru Estadu Unidu Amerika (EUA), Ned Price. Foto/Espesiál

Liuhusi deklarasaun bá imprensa ne’ebé Hatutan.com asesu husi Embaixada EUA iha Díli, Sesta (22/04/2022), Ned Price, hateten, sira-nia parte iha esperansa  boot no hein atu servisu hamutuk ho Prezidente eleitu Ramos-Horta hodi hametin parseria rohan-laek entre Estadus Unidus no Timor-Leste.  

“Ho abut metin iha valor no interese komún sira, ita nia parseria sei lori oportunidade atu hadi’ak moris povu Timor-Leste nian liu husi dezenvolvimentu ekonómiku, saúde públika, kooperasaun seguransa no interkámbiu edukasionál no formasaun. Ami elejia autoridade timoroan sira, inklui Sekretariadu Tékniku Administrasaun Eleitorál no Komisaun Nasional Eleisaun ne’ebé administra ona eleisaun ida ne’ebé livre, justu no transparente inklui votante rihun atus resin ne’ebé bá vota ho dame,”  Ned Price hateten.

Eleisaun Timor-Leste nian ida-ne’e, tuir Ned Price, sai hanesan inspirasaun ida bá demokrasia iha Sudeste Aziátiku, rejiaun Indo-Pasífiku no mundu.

“Konkista ida-ne’e reprezenta pasu importante ida iha Timor-Leste ninia esforsu makas sira, hodi harii no hametin demokrasia ida ne’ebé forte no dinámiku iha tinan 20 nia laran hanesan nasaun independente ida,” Ned Price haktuir.

Jornalista: Elio dos Santos da Costa