PNTL Halo Apreensaun ba Karreta Sanulu Besik Edifísiu PN-UNTL

Hatutan.com, (25 Abríl 2022), Díli—Polísia Nasionál Timor-Leste (PNTL), Komandu Munisípiu Díli, liuhosi unidade Polísia Tránzitu (Poltranz), iha Segunda 25 Abríl 2022, tuku 11:45, halo apreensaun ba karreta sanulu (10), besik edifísiu órgaun soberanu Parlamentu Nasionál (PN), ho Universidade Nasionál Timor-Lorosa’e (UNTL).

Komandante Polísia Tránzitu Munisípiu Díli, Inspetór Xefe Polísia, Domingos Sarmento Gama.

Apreensaun ne’e tanba motorista sira estasiona ka para transporte la tuir regra, to’o okupa hotu estrada públiku hodi mosu beibeik enggarafamentu iha área ne’e.

Lee Mós: Operasaun Kalan, PNTL Halo Apreensaun ba Motór 14 no Karreta tolu

Komandante Polísia Tránzitu Munisípiu Díli, Inspetór Xefe Polísia, Domingos Sarmento Gama esplika, Lei Kódigu Estrada artigu 6 pontu 1 ho 2, regula kona-bá fatin sira ba estasionamentu transporte nian.

Ba transporte sira ne’ebé mak estasiona iha filleira ida de’it, laiha problema tanba iha área ne’e laiha sinál tránzitu. Maibé, ba transporte sira ne’ebé mak estasiona ka doble parkir, sira ne’e viola lei kódigu estrada.

“Ida ne’e mak hamosu enggarafeamentu iha área Parlamentu oin, entaun karreta governu nian ida, inklui karreta privadu sia (9). Karreta sanulu mak halo estasionamentu dobru. Tanba ne’e, ita preende,” Inspetór Xefe Polísia, Domingos Sarmento Gama informa ba jornalista sira, durante hala’o operasaun no preende karreta sira iha estrada ibun, besik edifísiu PN ho UNTL oin, Segunda (25/04/2022).   

Durante ne’e Polísia halo beibeik operasaun ho rutina, maibé sidadaun maiória liu-liu funsionáriu públiku sira ne’ebé kondúz karreta governu nian sempre viola lei sira estasionamentu nian.

Tuir loloos motorista sira ne’ebé kondúz transporte governu nian tenke sai ezemplu ba transporte públiku sira seluk.

“Ita haree karreta governu nian ida mós halo estasionamentu dobru iha Parlamentu nia oin. Iha ne’e mós, ita nia membru PN sempre kestiona kona-bá estasionamentu ne’e. Kuandu estasionamentu dobru ona maka hamosu enggarafamentu. Tanba ne’e mak ita atua lorloron, hanesan mós estasionamentu sira iha Palásiu Governu nia oin, sorin-sorin,” Komandante ne’e hateten.

Operasaun ne’e mós bazeia ba pedidu hosi membru deputadu sira iha PN atu halo atuasaun ba transporte sira ne’e, tanba kada loron para karreta ho motór la regra ikus mai hamosu bebeik enggarefeamentu.

Komandante ne’e husu ba populasaun tomak, liu-liu motorista sira atu para transporte karik, tenke ho konsiénsia hodi obedese ba regra sira hosi PNTL, kona-bá lei kódigu estrada ka lei seguransa rodoviária nian.

Karreta sira ne’ebé PNTL halo ona apreensaun, sei aplika multa ba motorista sira atu lori ba selu iha banku molok foti fila karreta.

Tuir planu, hahú Tersa (26/04/2022) ba oin, Komunisipiu Munisipiu Dili liuhosi unidade Polisia Tránzitu (Poltranz), sei halo operasaun ne’ebé hanesan ho nia alvu maka kontrola motorista sira ne’ebé mak kondúz motirizada, maibé la obedese ba lei sira kona-bá estasionamentu nomós lei ba Seguransa Rodoviária nian.

Jornalista: Rogério Pereira Cárceres