Timor-oan 46 Selesionadu ba Serbisu iha Austrália

Hatutan.com (26 Abríl 2022) Díli—Governu liu husi Sekretáriu Estadu Profisionál no Empregu (SEFOPE) hala’o despedida ho Timor-oan na’in 46 kompostu hosi mane 41, feto na’in-lima  liu hosi programa Seasonal Worker Program (SWP) hodi ba serbisu iha Austrália durante fulan sia.

Diretór Nasionál Oversease Employment, Filomeno Soares.

Traballadór hirak ne’e sei arranka ba Austrália iha loron Kuarta (27/04/2022) no sei servisu iha área ortikultura. 

“Serimónia ofisiál hodi halo mobilizasaun ba serbisu iha Austrália no ohin ba dala sanulu resin rua ona ne’ebé kompostu hosi traballadór hamutuk 453 mak ba serbisu iha Austrália iha tinan ne’e. Traballadór 46 mak aban arranka ba serbisu iha Austrália ho kompañia tolu iha área ortikultura,” Diretór Nasionál Oversease Employment, Filomeno Soares hateten ba jornalista sira, hafoin despede traballadór sira iha Becora, Tersa (26/04/2022).

Tuir planu, iha semana oin traballadór barak mak sei arranka tán, tanba kontratu hosi kompañia tama barak ona, tanba tuir tarjetu iha tinan ne’e Governu sei haruka ema hamutuk 2.500, liu hosi programa foun ho naran Pasifik Level Skip ho kompañia limitadu ho durasaun kontratu mínimu tinan ida no másimu tinan tolu, nune’e bele hetan nafatin konfiansa hosi empregadór hosi Austrália.

Traballadór sira iha serimónia despedida ho Diretór Nasionál Oversease Employment, Filomeno Soares iha Becora, Tersa (26/04/2022). Foto/Hatutan.

Kona-bá traballadór na’in 353 ne’ebé halai sees hosi sistema liu-liu serbisu ilegál ona, hosi parte SEFOPE halo ona koordenasaun ho Ministériu Negósiu Estranjeiru no Kooperasaun (MNEK) hodi bele rezolve.

Parte SEFOPE husu ba traballadór sira atu serbisu ho di’ak liu-liu disiplina, hatudu hahalok di’ak nune’e bele kontinua hetan konfiansa hosi empregadór sira hodi kontinua serbisu hadi’a moris.

Tuir dadus ne’ebé iha, traballadór hamutuk 1.453 mak ba servisu iha Austrália liu hosi SWP no 173 liu hosi programa Pasifik Level Skip (PLS) no traballadór iha Korrea hamutuk 900-resin.

Jornalista: Carmelita Isaac