Governu Aprova Pakote Lejislativu ba Área Ambientál

Hatutan.com (27 Abríl 2022) Díli— Governu liu hosi reuniaun Konsellu Ministru (KM) aprova ona pakote lejislativu ba área ambientál, kompostu hosi projetu Dekretu-Lei haat, ne’ebé aprezenta hosi Sekretáriu Estadu Ambiente (SEA), Demétrio do Amaral de Carvalho, iha Kuarta (27/04/2022).

Reuniaun Konsellu Ministru (KM). Foto/KM.

Projetu Dekretu-Lei dahuluk ne’ebé aprova ona, ho ninia objetivu atu kria Autoridade Nasionál Lisensiamentu Ambientál,IP (ANLA) no aprova ninia estatutu sira.

Lee Mós: Governu Sei Halo Rehabilitasaun Kafé iha Tinan Ne’e

“ANLA sei iha misaun atu asegura implementasaun lejislasaun kona-bá lisensiamentu ambientál, hodi sai responsável ba avaliasaun projetu sira nian, klasifikasaun, emisaun lisensa ambientál no monitorizasaun ba atividade sira hosi entidade públika no privada sira enjerál,” Hatutan.com sita komunikadu.

Hosi Proponente no titulár sira lisensa ambientál sira nian, sein prejuízu ba kompeténsia sira hosi Ministériu Petróliu no Minerál rasik.

Institutu públiku ida-neé sei tutela ba Membru Governu ne’ebé responsável ba ezekusaun polítika ba área ambiente nian.

Projetu daruak ninia objetivu maka, atu halo alterasaun dahuluk ba Dekretu-Lei nu. 5/2011, loron 9 fulan-fevereiru, ne’ebé refere ba Lisensiamentu Ambientál.

Projetu ida-ne’e mosu atu kompatibiliza rejime Jurídiku kona-bá lisensiamentu ambientál ne’ebé iha ona, ho kriasaun hosi Autoridade Nasionál Lisensiamentu Ambientál, no mós atu garante posibilidade atu aprezenta dokumentasaun relevante saida-deít iha ámbitu prosedimentu lisensiamentu ambientál nian iha nivel lokál, tantu ba delegasaun ka reprezentasaun sira Autoridade Nasionál ne’e rasik, ne’ebé sei bele harii ba oin, no mós ba departementu governamentál ne’ebé responsavel ba ezekusaun polítika sira iha área ambiente nian, no ba ninia servisu deskonsentradu sira ho baze teritoriál no mós  ba entidade públika ka privada seluk  saida deít, ho ne’ebé sei estabelese kontratu ka parseria ho objetivu ida-ne’e.

Projetu Dekretu-Lei datoluk ninia objetu maka, harii  Autoridade Nasionál Dezignada ba Kombate Alterasaun Klímatika sira,IP (AND) no atu aprova ninia Estatutu sira.

AND sei ezerse ninia funsaun sira hosi Autoridade Nasionál Dezignada ba mekanizmu sira flexibilidade Protokolu Quioto nian, ho ninia misaun maka, liuliu, atu aprova partisipasaun entidade nasionál públika no privada sira iha projetu sira iha kontestu dezenvolvimentu moos no iha komérsiu emisaun sira nian, no autoridade ne’e mós sai hanesan interlokutór entre Repúblika Demokrátika Timor-Leste no Fundu Klimátiku Matak.

Projetu ikus ne’ebé aprezenta hosi Sekretáriu Estadu Ambiente ninia objetivu atu halo alterasaun dahuluk ba Dekretu-Lei nu. 15/2019, loron 10 fulan-jullu.

Projetu ne’e kona-bá Orgánika hosi Sekretaria Estadu Ambiente. Liuhusi kriasaun hosi Institutu Públiku ne’ebé  temi ona, no ne’ebé tutela husi  Sekretaria Estadu Ambiente nian, presiza atu halo agora ninia kompatibilidade ho autonomia téknika, administrativa, finanseira no patrimoniál ne’ebé institutu públiku sira-ne’e iha.

Jornalista: Rogério Pereira Cárceres