Hatutan.com, (28 Abríl 2022), Díli-Komunidade lubun ne’ebé movimentu bá mai liuhusi área tasi-ibun Motaél nian, Kinta loraik (28/04/2022), tuku 17:15 Otl, hakfodak no haree mate-isin joven mane ida iha tasi-ibun Motaél, Postu Administrativu Dom Aleixo, Munisípiu Díli.
Komunidade hobur hela joven ida ne’ebé mate hela iha tasi-ibun Motaél, Dili, Kinta (28/04/2022). Foto/Hatutan.com
Informasaun ne’ebé Hatutan.com rekolla hosi sasin sira hakbesik bá haree kondisaun mate-isin joven mane ida ne’e katak, mate isin ne’e, tasi nia laloran mak baku hosi tasi-klaran mai to’o tasi ibun.
Joven mane ne’e mate ho roupa; kalsa kór mean no faru kór matak, maibé kondisaun mate-isin ne’e, ran sulin nakonu iha parte oin nian.
Daudaun ne’e, Polísia Nasional Timor-Leste (PNTL) Munisípiu Dili, liuhusi ekipa Forensik, halo hela identifikasaun iha terrenu akontesimentu no dada mós fita ka police line. To’o oras ne’e, seidauk iha ema ruma ka família ruma mai koñese mate-isin ne’e.
Advertisement
Komunidade ne’ebé movimentu bá mai iha área tasi-ibun sempre hakat bá haree atu koñese, karik família besik.