Hatutan.com, (05 Maiu 2022), Díli—Tribunál Distritál Díli (TDD) iha Kinta 05 fulan ne’e kontinua hala’o julgamentu ba krime abuzu konfiansa agravadu ne’ebé deskonfia involve ema ho defisiénsia matan nu’udár Diretór Asosiasaun East Timor Blind Union (ETBU), arguidu UDC tanba foti karreta no komputadór asosiasaun nian ba rai iha uma no la fó fila ba asosiasaun.
Iha audiénsia atuál diretór ETBU, lezadu João Pereira deklara katak, momentu ne’ebá nia parte notifika ona ba arguidu hodi entrega karreta ho komputadór asosiasaun nian, maibé arguidu lakohi fó-fila to’o agora ho razaun lakohi husik ninia kargu nu’udár diretór ETBU.
Lee Mós: Tribunál Julga Jerente Na’in-rua husi ETBU Ba Krime Abuzu Konfiansa
“Ha’u troka arguidu nia fatin nu’udár diretór ETBU tanba nomeia husi Konsellu. Tanba ne’e, ha’u presiza karreta asosiasaun nian hodi kontinua hala’o servisu, maibé to’o agora la fó fila,” lezadu deklara.
Hafoin rona lezadu, Tribunál deside adia hikas julgamentu ba loron seluk hodi kontinua rona sasin sira seluk.
Antes ne’e, tuir akuzasaun hosi MP katak iha tinan 2018 to’o 2022 arguidu UDC asume responsabilidade hanesan Diretór ETBU no ZXL servisu iha área finansas, maibé iha loron 26 Juñu 2020 membru hosi asosiasaun ETBU eleitu fali lezadu ho inisial JP hodi troka arguidu tanba lakon konfiansa kona-bá ezekusaun orsamentu la tuir programa, maibé arguidu foti karreta hi lux proprietária asosiasaun ETBU nian hodi ba tau iha nia uma no to’o agora la entrega.
Arguidu ZXL mós foti komputadór ida ho mákina imprime ho marka HP iha sede asosiasaun ETBU no la entrega fali, tanba ne’e lezadu labele hala’o servisu.
Ho hahalok arguidu na’in-rua nian, MP akuza ba pratika krime abuzu konfiansa agravadu ne’ebé previstu iha artigu 257 hosi kódigu penál TL.
Audiénsia julgamentu prezide hosi juiz koletivu Argentino Luisa Nunes, Alvaro Maria Freitas, António Gonçalves, MP reprezenta hosi Prokuradór Reinato Berenahak no arguidu sira hetan asisténsia legál hosi Defensór Públiku João Carvalho.
Jornalista: Carmelita Isaac
