Polítika
Orsamentu Retifikativu Billaun $1-resin Aprovadu iha Jeneralidade
Hatutan.com, (09 Maiu 2022), Díli—Parlamentu Nasionál (PN), liuhosi diskusaun jeneralidade, iha Segunda 09 Maiu, aprova ona Orsamentu Jerál Estadu (OJE) Retifikativu ho montante billaun $1,129.857.250.
Plenária Parlamentu Nasionál. Foto/GPM.
“Rezultadu votasaun, afavor 36, kontra 24, abstensaun 5. Proposta de lei númeru 38/V (4a), aprovadu na jenerálidade,” Prezidente Parlamentu Nasionál, Aniceto Longuinhos Guterres Lopes, deklara rezultadu votasaun jeneralidade iha plenária PN, Segunda (09/05/2022).
Lee Mós: OJE Retifikativu 2022 Billaun $1-resin Fó Risku Boot Bá Jestaun Finanseira
Ho aprovasaun orsamentu ne’e, Primeiru Ministru (PM), Taur Matan Ruak agradese ba partisipasaun deputadu no deputada sira nian durante debate, no rejista preukupasaun sira hotu, hodi hadi’a liután iha debate espesiálidade tuir mai.
“Governu apresia no agradese partisipasaun distintus no distintas deputadus sira nian, durante diskusaun. Governu rejista preokupasaun sira hotu, ne’ebé levante durante debate, no promete atu kontinua partisipa no haklean diskursu diskusoins, perante sesaun tuir mai, iha espesiálidade, hodi hariku liután ita nia debate sira. Ho ida-ne’e, hakarak agradese ba distintus no distintas deputadus sira hotu ninia no obrigadu barak ba Prezidente PN,” PM Taur Matan Ruak hateten.
Despeza Sira Tuir Klasifikasaun Ekonómiku
Ho Proposta OJE Retifikativu ne’e siginifika Reseitas Konsolidada Setór Públiku Administrativu sa’e ba $3,234.522.481, enkuantu Despesas Konsolidada Setór Públiku Administrativu sa’e ba $3,233.908.681.
Reseitas hosi Órgaun Servisus Administrasaun Sentrál sa’e ba $2,987.140.197, enkuantu Despesas Órgaun Servisus Administrasaun Sentrál sa’e ba $2,987.140.197, ne’ebé fahe tuir kategoria klasifikasaun ekonómiku hanesan tuir-mai ne’e; i) Transférensia Públika ho montante $1,837.634.189; ii) Bens no Servisus ho montante $466,877.382; iii) Kapitál Dezenvolvimentu $390,177.399; iv) Saláriu no Vensimentu $250,537.130; no Kapitál Menór $41,914.097.
Alokasaun Orsamentu tuir medida sira Komplementár 13
Proposta OJE Retifikativu ho montante billiaun $1,1 ne’e sei uza hodi finansia medidas komplementár 13:
- Kriasaun Fundu Kombatentes Libertasaun Nasionál ho orsamentu alokadu billiaun $1.
- Pagamentu $200 ba kada família (exeptu funsionáriu públiku sira), millaun $70.
- Uma Kbiit Laek Plus, millaun $25.
- Bolsa Estudu ba Mellór Graduadu Estudante Ensinu Báziku no Sekundáriu, millaun $7,5.
- Programa Mão de Obra ba Postu Administrativu, millaun $7,2.
- Revitaliza kafé no subsídiu ba kafé Laku-teen, millaun $6,4.
- Pagamentu ba diferensa remunerasaun PNTL nian ho rejime salariál foun, ba membru PNTL 4.096, millaun $5,1.
- Harii Sede Arte Marsiál no Rituál, millaun $2,5.
- Programa Eskola iha Uma, millaun $2,1.
- Internet gratuita iha eskola sira, millaun $1,1.
- Subsídiu akomodasaun ba PNTL no F-FDTL, millaun $1,9.
- Estabelesimentu Sekretaria ba Asuntu Traballadór iha rai-liur no Komunidade Timoroan iha Diáspora, $500 mil;
- Emprégu ba mellór alunu universitáriu sira, $437,5 mil.
Tanba proposta de lei númeru 38/V (4a) ne’e, aprova ona iha faze jeneralidade, maka hahú iha loron 10 fulan-maiu 2022, sei tama kedan ba iha faze diskusaun espesiálidade, no la’o tuir giaun ne’ebé iha katak, diskusaun sempre hahú iha tuku 09:00, oras dadeersan.
Antes atu remata plenária Aniceto Guterres aviza mós katak, ba espesiálidade, propostas alterasaun, iha 18 propostas, hein katak bele admite hotu.
Jornalista: Rogério Pereira Cárceres