Seidauk iha Serteza Kona-bá Liga Futeból Époka 2022-2023

Hatutan.com, (16 Maiu 2022), Díli– Federasaun Futeból Timor Leste (FFTL) no Órgaun Liga Futeból Timor-Leste (LFTL) to’o oras ne’e seidauk iha konkordata feitu ida kona-bá implementasaun Liga Futeból Époka 2022-2023.

Lee Mós : LFTL Prolonga Tempu Rejistrasaun Jogadór ba Klube Primeira-Segunda Divizaun

FFTL ho LFTL mós to’o agora seidauk halo sorumutuk formal hodi diskute apoiu finanseiru, oráriu no rejistrasaun bá klube partisipante sira.

Diretór Relasaun Publika LFTL, Diogo Neto Fraga. Foto/Hatutan.com

Diretór Relasaun Publika LFTL, Diogo Neto Fraga hateten órgaun liga iha planu atu halo enkontru ho FFTL haree destinu futeból iha Timor-Leste bá oin oinsá, une’e klube partisipante sira bele iha serteza hodi mai halo rejistrasaun tuir prosedimentu legál ne’ebé iha no tuir regulamentu interna LFTL no FFTL nian inklui mós  regra sira husi Federasaun Futeból Mundial (FIFA).

Dezde fulan-Fevereiru, tinan ne’e, órgaun Liga halo ona anúnsiu bá iha klube sira primeira no segunda divizaun atu halo transferénsia bá jogadór hodi mai rejista iha órgaun liga, infelizmente to’o oras ne’e órgaun liga loke ona rejistrasaun bá daruak nian, maibé klube sira seidauk mai rejista tamba sei hein serteza husi parte finanseira nian hanesan FFTL no Governu liu husi Sekretáriu Estadu Juventude no Desportu (SEJD), atu nune’e, klube sira bele iha garantia ida hodi  halo transferénsia no rejista iha Órgaun Liga.

Diogo Neto Fraga afirma dezenvolvimentu futeból iha Timor-Leste bá époka ne’e atu lao ka lala’o parte federasaun nonook de’it no laiha informasaun ida ofisial mai iha órgaun liga, atu nune’e, iha serteza hodi bele hahú organiza liga bá tinan ne’e.

“Liga buka meius nafatin hodi halo aproximasaun ho FFTL, maibé FFTL sira nonook no laiha kompromisu  ida sériu atu tur hamutuk ho órgaun liga hodi buka solusaun ba iha liga futeból époka ne’e,” Diogo Neto Fraga haktuir bá jornalista sira liu husi konferénsia imprensa iha sede LFTL, Díli, Segunda (16/05/2022).

Diretór  relasaun publika FFTL ne’e hatutan, fundu bá LFTL nia hun mai husi SEJD no iha époka kotuk LFTL simu osan hamutuk $310,000.00 ne’ebé Governu aloka liu husi FFTL atu órgaun liga bele organiza liga no osan restu husi époka kotuk ho montante $71.277,062 atu bele hatama hikas bá Kofre Estadu.

FFTL Informa Ona bá LFTL atu Époka Ne’e Hahú Fulan-Agostu

Prezidente FFTL, Francisco Jeronimo ho Sekretariu Jerál Gregorio Correia. Foto/Hatutan.com

Prezidente Federasaun Futeból Timor Leste, Francisco Martins da Costa Pereira Jeronimo,  hateten sira-nia parte FFTL informa ona ba iha órgaun LFTL katak époka ne’e labele hahú agora, maibé tenke hahú iha fulan-Agostu 2022 adapta bá kalendáriu husi FIFA.

Prezidente FFTL ne’e mós lamenta ho relatóriu husi órgaun LFTL ne’ebé too agora seidauk kompletu no presiza ko’alia bá malu mas kestaun tempu, nune’e, nia parte seidauk iha prontidaun atu hasoru malu ho órgaun LFTL maske parte liga halo ona pedidu formal atu hasoru malu hodi diskute kle’an kona-bá destinu LFTL époka ne’e.

Nia afirma parte LFTL husu dunik atu hasoru malu tamba ne’e iha tempu badak sei hasoru malu ho LFTL atu esklarese bá sira no buka hatene sira-nia preparasaun too ona iha ne’ebé.

“Sira ansi lahalimar atu joga ona, be joga ne’e fulan-Agostu ne’e. Ohin ne’e, ita lalais tiha ona hanesan Timor ne’e atu nabeen ona ne’ebé buat hotu tenke lalais,” Francisco Martins da Costa Pereira Jeronimo hateten.

Relasiona ho relatóriu liga Futeból époka kotuk, prezidente FFTL ne’e dehan relatóriu seidauk submete hotu no dadus hatudu konta bankária jerál FFTL nian osan seidauk tama no rekoñese katak simu ona karta eskrita ida katak osan restu husi liga époka kotuk maibé iha realidade osan seidauk tama.

“Ami husu deskulpa, ami seidauk hetan no loroloron ami konfirma hela ho banku. Labele dudu sala mai hotu FFTL,”  Francisco Jeronimo hateten.

Jornalista: Vito Salvador