Hatutan.com, (19 Maiu 2022), Díli— Prezidente Repúblika (PR), Francisco Guterres Lú Olo, sei simu kondekorasaun Grande Colar da Ordem do Infante Dom Henrique hosi Prezidente Repúblika Portugeza, Marcelo Rebelo de Sousa.
Prezidente Repúblika (PR), Francisco Guterres Lú Olo. Foto/Média PR.
Serimónia kondekorasaun atribuisaun Grande Colar da Ordem do Infante Dom Henrique sei hala’o iha Palásiu Prezidensiál Nicolau Lobato, iha 19 Maiu 2022, tuku 18.00.
“Grande-Colar da Ordem do Infante D.Henrique atribui ba sira ne’ebé hala’o serbisu relevantes ba Portugál, iha País no estranjeiru, hanesan mós serbisu ba espansaun kultura portugeza ou ba koñesimentu Portugál, nia istória no ninia valores,” Hatutan.com sita komunikadu hosi Palásiu Prezidensiál Nicolau Lobato.
Grande-Colar da Ordem do Infante D. Henrique nu’udar grau Ordem ida ne’ebé as liu atribui husi Prezidente Repúblika ba Xefe Estadu país estranjeirus.
Advertisement
Grande-Colar atribui mós hosi Prezidente Repúblika ba antigu Xefe Estadu ka ema sira ne’ebé iha natureza estaordinária no relevánsia espesiál ho Portugál ne’ebé merese atu simu grau Ordem ida-ne’e.