Nasionál
Cabo Verde Prontu Apoiu TL iha Área Kooperasaun Institusionál
Hatutan.com, (21 Maiu 2022), Díli- Cabo Verde prontu servisu hamutuk ho TL iha área kooperasaun institusionál hodi hametin relasaun amizade ne’ebé nasaun rua iha.
Ministra Prezidénsia Konsellu Ministru Cabo Verde, Filomena Gonçalves. Foto/Hatutan.com
Deklarasaun ne’e hato’o husi Ministra Prezidénsia Konsellu Ministru Cabo Verde, Filomena Gonçalves hafoin hasoru malu ho Prezidente Repúblika José Manuel Ramos-Horta iha Palásiu Prezidensiál, Dili, Sabdu (21/05/2022).
“Ha’u mai hasoru malu ho Prezidente Repúblika atu reafirma apoiu Cabo Verde nian bá Timor-Leste, ba konvivénsia pasifika entre povu nasaun rua no kontinua hametin kooperasaun Institusionál bá futuru,” Filomena Gonçalves hateten.
Parte sira ko’alia kona-bá kooperasaun institusionál entre rai rua lori mós governu no Estadu Cabo Verde nia naran fasilita Prezidente Repúblika bá selebrasaun tinan 20 restaurasaun independensia Timor-Leste.
Cabo Verde sira deseju susesu bá povu Timor-Leste bá servisu administrasaun iha Estadu no governu atu lori mudansa signifikativu bá povu nia moris.
Jornalista: Vito Salvador