Ekonomia
PM Taur Husu Traballadór 214 Hatudu Komportamentu Di’ak Iha Austrália
Hatutan.com, (07 Juñu 2022), Díli—Primeiru Ministru (PM), Taur Matan Ruak husu ba traballadór timoroan na’in 214 ne’ebé iha tempu besik atu sai ba servisu iha Austrália tenke hatudu hahalok di’ak.
“Favór ida, ita boot sira kontribui ho hahalok di’ak atu bele haforsa liután, manán liu tana fiar. Ha’u hatene, traballadór sira ne’ebé uluk bá, iha balun halai sees hosi sistema,” PM Taur Matan Ruak hateten iha ba traballadór sira iha salaun Delta-nova, Díli, Tersa (07/06/2022).
Lee Mós: Traballadór Timoroan 333 Iha Austrália Viola Kontratu
Governu Timor-Leste ho Austrália halo servisu maka’as loos, atu kria kondisaun ba timoroan sira, atu iha oporutnidade ba servisu iha Austrália. Bainhira timoroan sira hatudu hahalok ne’ebé di’ak, signifika traballadór sira mak manán, Austrália manán no timoroan hotu manán.
Maske nune’e, Taur Matan Ruak, husu ba traballadór sira ne’e, atu labele haluha katak, regulamentu no lei sira iha servisu fatin, ema mak halo. Kompara hanesan uma ida karik nia iha janela no iha mós odamatan.
“Ita kuandu sees, ita Hanoin ita halai lívre ona, la’e. Ita tama fali ida mais aat liután. Tanba ne’e, labele,” Xefe governu Taur Matan Ruak, fó-hanoin.
Timoroan sira ne’ebé mak servisu iha Austrália tenke hala’o mós kna’ar hanesan embaixadór sira. Traballadór ida-idak tenke sai embaixadór ba nia aan rasik liu-liu embaixadór ba TL, liuhosi hatudu hahalok ne’ebé di’ak.
Austrália ho Timor-Leste, hanesan nasaun viziñu no TL iha nia nasaun viziñu rua de’it, hosi sorin Indonézia no sorin Austrália. Baibain ema dehan hili viziñu di’ak liu, amigu. Tanba ne’e tenke iha relasaun ne’ebé di’ak ho nasaun viziñu sira.
Embaixadór Austrália iha TL Bill Costelo konsidera despedida ida-ne’e hanesan inisiu ne’ebé di’ak tanba iha fulan-juñu 2022 ne’e nia laran sei mobiliza númeru traballadór ne’ebé boot atu ba servisu iha Austrália.
Embaixadór Bill Costelo, hato’o nia kongratulasaun ba Governu liuhosi SEFOPE tanba iha fulan importante hosi mobilizasaun traballadór ida ne’e hanesan rezultadu hosi servisu maka’as ema barak nian no organizasaun barak nian.
Totál traballadór na’in 214 kompostu hosi feto 122 no mane hamutuk 92. Hosi traballadór sira ne’e, na’in 11 ba servisu iha kompañia Connect Group, 14 iha Cutri Fruit, 16 iha kompañia Kuala Farm, 10 iha Hillwood Berries Tsl, 10 iha Hillwood Berries Stothart, 9 iha Connect Group TI, 24 iha Tasmania Berries Group I, 68 iha Tasmania Berries Group II, 19 iha Hillwood Berries, no nain 8 servisu iha kompañia Meat Work.
Tuir planu iha kuarta 08 juñu 2022, traballadór sira ne’e sei arranka ba Austrália hodi hahú servisu.
Jornalista: Rogério Pereira Cárceres