Semitériu Públiku Foun Iha Metinaro Ektares 35

Hatutan.com, (14 Juñu 2022), Díli— Autoridade munisípiu Díli halo ona lansamentu ba semitériu públiku foun iha área postu administrativu Metinaro, tanba semitériu públiku sira iha Dili laran ne’ebé laiha ona espasu.

Autoridade Miunisípiu Díli lansa ona semitériu públiku foun ho nia medida ekteres 35 iha Suku Wenunuk, Postu Administrativu Metinaro, Tersa (14/06/2022). Foto/AMD.

Lansamentu ne’e, hala’o hosi Prezidente Autoridade Munisipiu Díli Guilhermina Filomena Saldanha Ribeiro, hamutuk ho Prezidente IGE,I.P Ermenegilda da Costa Laurentina, no Administradór Postu Administrativu Metinaro, Komandante PNTL Postu Metinaro iha Suku Wenunuk.

“Ida-ne’e desizaun anteriór kedan, haree ba Dili laran laiha ona espasu atu bele hari tan semitériu. Postu Administrativu ida ne’ebé mak sei iha espasu atu ita halo semiteriu públiku maka Metinaro, atu bele hatan ba iha familia ruma bele mai iha ne’e,” Hatutan.com sita deklarasaun Guilhermina Filomena Saldanha Ribeiro, iha komunikadu.

Semitériu foun ne’e ho nia medida  hektares 35, maibé ida-ne’e primeira parte halo lansamentu hahú ho  hektares lima ho orsamentu $29.000.

Osan ne’e utiliza hodi apoia tékniku sira hodi ateiru, haree mós kombustível, no insentivu ba tékniku sira durante fulan ida ba ateru rai.

Iha fatin hanesan Prezidente IGE,I.P, Ermenegilda da Costa Laurentina, konsidera atividade ne’e Autoridade Munisipiu Dili nian, liu hosi Ministériu Administrasaun Estatal no iha tinan kotuk sira husu ajuda hosi IGE,I.P. ba mákina pezadu sira tenki mai ajuda atu loke semitériu foun ho nia razaun ne’ebé mak tuir informasaun katak semitériu Becusi hela de’it ona 2% ne’e nakonu ona.

Entaun, antes nakonu hanesan Politika VIII Governu Konstitusionál haree ba situasaun sira ne’ebé mak agora enfrenta tenki preparadu.

IGE,I.P prepara tékniku no Enjeñeiru ho mekániku sira, no mós operadór ho mákina pezadu ho fuzu atu hala’o servisu bazeia ba relatóriu survey hosi Enjeñeiru  sira foti ona katak sei hamoos ateiru ba futuru semitériu foun Komesa ona halo servisu durante fulan ida depois de Autoridade Munisipiu Dili loke Tenderizaun ba kompaña sira.

Jornalista: Rogério Pereira Cárceres