Ekonomia
Horta Vizita Heineken no Husu Governu Fó Protesaun Bá Produsaun Rai-Laran
Hatutan.com, (23 Juñu 2022), Díli- Prezidente Repúblika (PR), José Manuel Ramos-Horta, Kinta (23/06/2022), halo vizita kortezia ida bá baze produsaun Heineken no husu bá Governu fó protesaun bá produsaun rai-laran no reduz importasaun tua husi nasaun seluk ne’ebé ho alkóliku as.
PR Ramos-Horta vizita baze produsaun beer Heineken iha Hera, 23 Juñu 2022. Foto/Hatutan.com
Xefe Estadu klarifika katak nia vizita bá baze investimentu internasionál Heineken tamba kria empregu ema atus ba atus mak benefisia nu’udar servisu ne’ebé hetan iha ne’e. Atu halo investimentu ne’e presija produtu nasionál ruma hanesan bee, maibé bee ne’e mós presija tratamentu, uza mós ai-farina halo bá tua no sira seluk.
Ramos-Horta haree katak Governu autoriza fabrika iha ne’e tanba kria empregu, maibé Governu ladún fó protesaun bá investimentu ida ne’e, la fó protesaun oinsá tanba husik nafatin serveza oin-oin mai husi li’ur no balun perigozu tebetebes bá joven sira.
Iha empreza importador balun hatama tua ho nia persentajen alkóliku as tebetebes iha super merkadu sira ne’e, balun to’o kedas 20% no balun lubun ida tama ilegalmente Governu la tau matan ba ida ne’e. Razaun ne’e mak motiva Xefe Estadu bá vizita hodi haree no nia iha intensaun atu promove serveza no laiha interese pessoal ruma, laiha bussines no supermerkadu inklui laiha kiós família ruma ne’ebé negósiu ka fa’an tua.
“Ha’u preokupadu bainhira ha’u haree serveza ne’ebé alkóliku ne’e as tebe-tebes nem selu impostu, Governu karega impostu Heineken, Heineken selu kontribui liu husi impostu de’it osan lubuk ida tama kofre Estadu nian,” Ramos-Horta hateten.
Xefe Estadu ne’e hatutan empreza sira seluk ne’ebé importa serveza alkóliku as tebe-tebes ne’e la selu impostu, no selu karik impostu mos tuir grau ne’ebe normál maibé loloos ne’e iha rai seluk bainhira alkóliku as tebe-tebes impostu mós tenke as liu tan, iha Timor kontráriu fali alkóliku ne’e as liu impostu badak liu.
“Ha’u nia rekomendasaun ba governu mak bandu importasaun serveja ne’ebé ho alkóliku liu nivél altu ne’ebé estandar internasionál nian ne’e ajuda proteje mós marka ida kria empregu iha Timor Leste,” Horta hateten.
Horta subliña Governu tenke buka proteje investimentu ne’ebé halo iha rai-laran, tanba sira mak halo investimentu, sira seluk ne’ebé la’ós Heineken hatama serveza ne’e sira la kria empregu, sira nia fabrika iha rai seluk sira fó empregu bá ema seluk iha rai seluk.
Jornalista: Vito Salvador