Polítika
Estatutu Karreira Dosente Universitária Aprovadu
Hatutan.com, (29 Juñu 2022), Díli—Konsellu Ministru (KM) aprova ona projetu Dekretu-Lei, ne’ebé aprezenta hosi Ministru Ensinu Superiór, Siénsia no Kultura (MESSK), Longuinhos dos Santos, ne’ebé ho objetivu atu halo alterasaun datoluk ba Dekretu-Lei nu.7/2012, loron 15 fulan-fevereiru, ne’ebé aprova kona-bá Estatutu Karreira Dosente Universitária.
Reuniaun Konsellu Ministru (KM). Foto/Média MOP.
Ho projetu Dekretu-Lei ne’e, propoin alterasaun rejime jurídiku lubun ida ba Karreira Dosente Universitária Timor-Leste ho hanoin atu kontinua hadi’a, maibé mantein bebeik bazeia ba prinsípiu bazilar méritu nian iha ezersísiu atividade dosente, ne’ebé ligadu ba investigasaun, dosiénsia no kontribuisaun ba dezenvolvimentu sosiedade.
Lee Mós: KM Aprova Subsídiu ba Akadémiku Sira
“Entre alterasaun sira ne’ebé prevee iha Dekretu-Lei ida-ne’e. Destaka kriasaun ba nivel foun rua iha kategoria rua ne’ebé la hanesan (B3 NO C1+), ajustamentu ba kréditu sira entre kategoria B3 no C3, garantia katak sei konsidera kréditu sira hotu ne’ebé hetan hahú kedas omologasaun kareira nian to’o agora, diminuisaun ba númeru tinan esperiénsia ho abilitasaun nian hodi bele progride iha kareira (tinan lima ba de’it tinan ida ) no distinsaun entre dosente sira kareira nian no dosente kontratu sira,” Hatutan.com sita komunikadu.
Fó-hanoin katak, iha loron 23 Fevereiru 2022, Konsellu Ministru aprova ona projetu Dekretu Governu nian, ne’ebé aprezenta mós hosi Ministru Ensinu Superiór, Siénsia no Kultura, Longuinhos dos Santos, kona-bá alterasaun dahuluk ba Dekretu Governu nian n.2/2015, loron 14 fulan-janeiru, ne’ebé aprova subsídiu akadémiku sira, bonus ba Xefia no komplementu estraordináriu sira ba pesoál dosente Universidade Nasionál Timor-Lorosa’e (UNTL) nian.
Ho alterasaun ida-ne’e, subsídiu akadémiku no komplementu espesiál ba akizisaun materiál tékniku no sientífiku sei iha efeitu retroativu sura hahú husi loron 1 fulan-Janeiru tinan 2014, hanesan ho loron hahú kálkulu bonus xefia nian.
Jornalista: Rogério Pereira Cárceres