PR Simu Karta Kredensial Husi Embaixadór Brunei Darussalam ho Reinu España

Hatutan.com, (15 Jullu 2022), Díli- Prezidente Repúblika (PR), José Ramos-Horta, Sesta (15/07/2022), simu karta kredensial husi Embaixadór Brunei Darussalam, Wan Hadfi Lutfan Bin Haji Abdul Latif no Embaixadór Reinu España, Francisco Asis Aguilera Aranda ne’ebé rezignadu mai Timor-Leste.

Lee Mós : Ramos-Horta Kondekora Country Diretór WFP Medalla Grau Orden Timor-Leste

PR Ramos-Horta ho MNEK Adaljiza Magno foto hamutuk ho Embaixadór Spaña mai Timor-Leste, Francisco Asis Aguilera Aranda. Foto/Hatutan.com

Ministra Negósiu Estranjeiru no Kooperasaun (MNEC), Adaljiza Magno hafoin akompaña Prezidente Repúblika simu karta kredensial husi Embaixadór Brunei Darussalam no Reinu España, iha Palásiu Prezidensiál, hateten nasaun rua halo aprezentasaun bá sira-nia karta kredensial parte Timor-Leste liu husi Xefe Estadu  ko’alia mós kona-ba asuntu bilaterál ho nasaun rua oinsá atu hametin relasaun diplomasia entre nasaun sira ne’e ho Timor-Leste.

Ho Embaixadór Brunei Darussalam, Wan Hadfi Lutfan Bin Haji Abdul Latif ko’alia hikas kona-bá kompromisu ne’ebé halo iha Brunei Darussalam hanesan asina tiha ona akordu servisu aéreu nian ne’ebé Governu liu husi Konsellu Ministru no Parlamentu Nasionál halo tiha ona ratifikasaun no husi parte Brunei mós halo nia prosesu doméstiku sira hodi prosesa mós dokumentu nesesáriu sira  atu aviaun Royal Brunei bele semo mai Timor-Leste regulármente, hanesan saida mak akontese tiha ona Qantas Austrália.

“Brunei Darussalam mós iha kompromisu atu halo kooperasaun ho Timor-Leste iha area saúde no mós edukasaun,” Ministra Adaljiza Magno hateten.

Dezde uluk kedas Brunei Darusalam fó bolsu estudu bá Timor-Leste maibé tanba edukasaun iha Brunei Darusalam ho lian Inglés tanba ne’e Timor-Leste husu atu sira fó fasilidade bá Timoroan ne’ebé pasa iha selesaun atu bele iha kursu preparasaun ho durasaun fulan 3-6 antes tama bá universidade.

PR José Ramos-Horta, ho MNEK Adaljiza Magno foto hamutuk Embaixadór Brunei Darussalam, Wan Hadfi Lutfan Bin Haji Abdul Latif. Foto/Hatutan.com

Timor-Leste mós hanoin atu halo kooperasaun iha area saúde tanba iha Brunei baratu uitoan nune’e Estadu no Governu Timor-Leste bele iha hanoin halo negosiasaun atu se bele karik haruka pasiente bá halo tratamentu iha Brunei, tanba kustu baratu no distánsia mós ladún dook.

“Ho España ita ko’alia kona-bá oinsá hametin liután kooperasaun iha diálogu polítiku kada tinan hahú husi nivel señór officer bá to’o iha nivel Ministeriál atu bele haree hodi adapta mós investimentu España nian mai Timor,” Adaljiza Magno haklaken.

Ho Embaixadór España, Francisco Asis Aguilera Aranda, Xefe Estadu husu atu sira apoiu kandidatura Timor-Leste nian bá Konsellu Direitus Umanus. Durante ne’e kooperasaun espesífiku ho Reinu España  nia rezultadu Timor-Leste hetan liu husi fundu hotu-hotu Uniaun Europeia nian.

Jornalista: Vito Salvador