CS Ameasadu Prizaun Preventiva ba Krime Violasaun Seksuál Hasoru Minoridade

Hatutan.com, (01 Agostu 2022), Díli—Tribunál Distritál Díli (TDD) liu hosi primeiru interrogatóriu ne’ebé hala’o iha loron 01 fulan ne’e, liu hosi alegasaun Ministériu Públiku (MP) reprezenta hosi Prokuradór Nelson Carvalho, husu ba juiz prezide Afonso Carmona atu aplika medida koasaun Prizaun Preventiva ba arguidu ho inisiál CS ba krime violasaun seksuál hasoru minoridade tanba halo ona violasaun seksuál hasoru lezada L ne’ebé ikus-mai rezulta lezada gravida.

Ilustrasaun Kona-bá violasaun seksuál hasoru minoridade. Foto/Google.

Razaun MP husu medida koasaun ne’e, tanba iha indisius forte ba arguidu nia involvimentu iha krime violasaun seksuál ne’e bazeia ba lezada nia deklarasaun ne’ebé ikus-mai rezulta lezada gravida.

Lee Mós:JC Alegadu Prizaun Tinan Haat Tanba Halo Violasaun Seksuál Hasoru Menoridade

Parte Defensór Públiku (DP), Manuel Sarmento husu ba Tribunál atu aplika medida koasaun aprezentasaun periódika ba arguido, tanba laiha indisius forte atu lori arguidu ba prizaun preventiva.

Hafoin alegasaun, juiz prezide deside suspende audiénsia durante oras rua nia laran hodi rona desizaun.

Iha Primeira Interrogatóriu ne’e, MP promove arguidu ba prátika krime violasaun seksuál hasoru minoridade ne’ebé previstu iha artigu 177 hosi kódigu penál Timor Leste.

Tuir kronolojia katak, arguidu komete aktu krime violasaun seksuál refere iha área Manleuana Casnafar, hafoin hetan lezada ne’ebé halo hela movimentu iha tempu ne’ebá.

Audiénsia julgamentu prezide hosi Juiz singulár, Afonso Carmona, MP reprezenta hosi Prokuradór Nelson Carvalho no Arguidu hetan asisténsia legál hosi Defensór Públiku Manuel Sarmento.

Jornalista: Carmelita Isaac