Uma Dame Sai Edifísiu Provizóriu APS Manatuto

Hatutan.com, (03 Agostu 2022), Díli—Governu liuhosi Sekretária Estadu Terras no Propriedades, Diresaun Nasionál Terras no Propriedades (SETP-DNTP) Munisipiu Manatuto, entrega antigu Uma Dame ba Autoridade Protesaun Sivíl liuhosi Diresaun Nasionál Prevensaun Konflitu Komunitáriu (APS-DNPKK) atu utiliza halo servisu ba atendimentu públiku.

Diresaun Nasionál Terras no Propriedades (SETP-DNTP) Munisipiu Manatuto, entrega antigu Uma Dame ba Autoridade Protesaun Sivíl liuhosi Diresaun Nasionál Prevensaun Konflitu Komunitáriu (APS-DNPKK) atu utiliza halo servisu ba atendimentu públiku. Foto/DNPKK.

Komandante Operasaun Nasionál Autoridade Protesaun Sivíl, Superientendente Asistente Polísia Nuno Gomes iha abertura agradese ba apoiu tomak DNTP ne’ebé oferese edifísiu no espasu hodi fasilita servisu protesaun nian.

Lee Mós: Servisu Protesaun Sivíl Tenke Ho Sakrifísiu no Matenek

“Agradese ba DNTP ho espasu no edifísiu foun ne’e bele fasilita Autoridade Protesaun Sivíl ninia servisu. Tanba ne’e, husu ba estrutura APS Manatuto atu uza edifísiu ho kuidadu ba interese Estadu, atu atende komunidade,” Superientendente Asistente Polísia Nuno Gomes, hateten iha karta komunikadu ne’ebé Hatutan.com asesu Kuarta (03/08/2022).

Iha fatin hanesan, Diretór Nasionál Terras no Propriedade Munisípiu Manatuto, Miguel Soares hateten uma refere hanesan provizóriu de’it hodi fasilita servisu.

“Ami entrega eis Uma Dame ba DNPKK atu uza hodi fasilita servisu nu’udár direitu de uzu ka provizóriu de’it, la’os sai na’in, tanba ami laiha kbiit atu entrega tomak uma ho rai. Ami munisípiu só fó de’it arrendementu ba instituisaun Estadu ne’ebé hakarak uza, tanba ne’e DNPKK uza ba interese servisu hodi halo atendimentu ba komunidade nia problema,” Miguel Soares hateten.

Jornalista: Carmelita Isaac