Olimpiade Xadrés Mundiál, Ekipa Mane TL Manan Fiji

Hatutan.com, (06 Agostu 2022), Díli- Hakur bá ronde da-VII Olimpiade Xadrés Mundiál iha India, ekipa mane Timor-Leste manan ekipa husi Fiji.  Ho rezultadu ne’e Atleta Xadrés Timor Leste Hélder de Araújo no Sonizia da Silva ‘bele’ hetan títulu Direta husi FIDE iha Olimpiade Xadrés Mundiál, tinan ne’e.

Lee Mós : Ronde VI Olimpiade Xadres Mundiál, Ekipa Feto TL Ultrapasa Nasaun 54

Atleta Xadrés Timor Leste Hélder de Araújo kontra atleta husi Fiji. Foto/Espesiál

Atleta Xadrés Timor Leste potensiál, Helder de Araújo ne’ebé molok ne’e manán ona da-IV iha Ronda Dahituk kontinua hatudu jogu impresizu hodi halakon atleta husi Fiji, Ronald Terubia.

“Manán ida-ne’e nu’udar manán bá da-V husi atleta naktemin (Hélder de Araújo-red) iha eventu prestíjiu ne’e. Atleta Tito dos Reis ne’ebé nu’udar mós Kapitaun Ekipa, gaña ninia manán daruak nian iha eventu Olimpiade Xadrés ne’e hafoin hamate liurai husi oponente ho naran Prashant Sarup,” sita komunikadu husi Federasaun Xadrés Timor Leste.

Atleta nasionál seluk, Cosme Guterres mós ho esforsu tomak empata ho adversáriu ho Avinesh Nadan. Molok ne’e atleta mane seluk Marcos da Conceicão la konsege kontribui pontu bá ekipa mane hafoin lakon ho atleta ho Rudr Prasat

Ho manán husi ekipa Mane iha ronda Da-VII ne’e, totál pontu ne’ebé relolla mak 9.5. Tanba la konsege gaña pontu, ekipa Feto sira nafatin ho pontu 10.

Atleta Xadrés Timor Leste  Na’in–rua Dei Hetan Títulu FIDE Master

Ho vitória ne’ebé Atleta Xadrés Timor-Leste, Helder de Araújo iha durante kampeonatu Olimpiade Xadrés Mundiál ne’e no refleta bá Regra FIDE nian, atleta ne’e prienxe ona rekizitu mínimu atu hetan Títulu Direta nu’udár FIDE Master (FM) ho manán da-V  ne’ebé nia konkista molok Ronda Da-IX nia rohan.

Atleta Feto Timoroan Sonizia Tilman da Silva mós prienxe ona rekizitu mínimu FIDE nian atu hetan Títulu Direta Women Candidate Master (WCM) tanba molok Ronda Da-VII ramata atleta ne’e hetan ona pontu 3.5.

Ho manán sira ne’e, atu hetan Títulu Direta sei iha mós konsiderasaun seluk mak  Rating mínimu atu hetan títulu direta.

Jornalista: Vito Salvadór