Justisa & Krime
Novembru Iha Ona Sertifikadu Na’in ba Rai
Hatutan.com, (17 Agostu 2022), Díli—Iha novidade di’ak hosi Ministériu Justisa (MJ) katak, iha ámbitu kommemorasaun loron Proklamasaun Unilaterál Independénsia Timor Leste nian iha 28 Novembru tinan ne’e, sei realiza atribuisaun sertifikadu titulu na’in ba rai ba sidadaun sira.
Parte Ministériu Justisa halo atribuisaun sertifikadu ne’e tanba Prezidente Repúblika (PR) José Ramos Horta promulga ona Dekretu Lei Informasaun Kadastru Perdiál iha loron 15 fulan ne’e.
Lee Mós: Konsellu Ministru Aprova Dekretu Lei Informasaun Kadastrál Prediál
Ministru Justisa, Tiago Amaral Sarmento agradese ba Xefe Estadu tanba ho lei ne’e kompleta ona normas ba implemetasaun lei rai nian no ajuda Ministériu hodi bele atribui sertifikadu titlu na’in ba rai ba sidadaun sira.
“Ho promulgasaun Dekretu-Lei informasaun kadastru Perdiál hosi Prezidente Repúblika, faze tuir mai tuir planu sei hahú atribuisaun sertifikadu hosi Rejiaun Administrativa Espesiál Oecusse- Ambeno (RAEOA) iha loron 28 fulan Novembru,” Tiago Amaral Sarmento hateten iha Kuarta (17/08/2022).
Tuir dadus hosi Diresaun Nasionál Terras no Propriedade (DNTP) rejista rai hamutuk 370.000 parsela, iha disputa nia laran hamutuk 42.000 no laiha disputa 328.000 iha Timor Leste ne’ebé kobre 13 Munisípiu inklui RAEOA bazeia ba levantamentu dadus hosi projetu Servisu Nasional Cadastro (SNC) iha tinan 2003.
Hosi númeru ne’e, rai ne’ebé rejistu no laiha disputa maka sei iha direitu atu hetan sertifikadu títulu na’in ba rai hodi fó konsiderasaun mós ba dokumentu rai iha tempu Portugés no Indonézia.
Tuir lei 23/2017 kona-bá definisaun bens e móveis, define klaru se de’it mak atu hetan sertifikadu rai ne’e ho kategoria rua, primeiru direitu primária signifika Timor oan ne’ebé antes ne’e iha ona sertifikadu rai nu’udár direitu proprietáriu iha tempu Portugés no Indonézia automatikamente bele hetan sertifikadu na’in ba rai husi Governu tanba lei garante.
Segundu, direitu sekundáriu ba hirak ne’ebé iha tempu Portugés no Indonézia utiliza rai hanesan direitu do uzu no hirak ne’ebé sei iha disputa nia laran Governu sei la atribui sertifikadu ne’e.
Jornalista: Carmelita Isaac