Husi Renato’ Apaa Sege’ Costa

Iha inisiu fulan oin loron 3 Maiu,  mundu sei selebra  Loron Mundiál Liberdade Imprensa 2026, ” Shaping a Future at Peace – Forma Futuru ida ho Dame,”. Ho tema nee, ita hotu tenke  konxiénti katak selebrasaun loron Mundial ba Liberdade Imprensa tenke sai reflesaun klean ida ba ita hotu kona-ba oinsá   harii esfera públika ida ne’ebé saudavel, nakloke no demokrátiku husi informasaun sira neebe publika husi imprensa sira. Tema ba tinan ida nee, ne’ebé subliña  “Forma Futuru ida ho Dame,” signifika katak dame labele eziste bainhira laiha liberdade imprensa ho jornalizmu independente sira hodi hamosu informasaun ne’ebé loos,

Mensajen ho tema nee halo afirmasaun ida neebe klaru tebes  katak jornalista no mídia livre hodi halao sira nia papel iha sosiadade nia leet tamba sira mak konstrutór ativu ba dame. Bainhira sidadaun sira iha asesu ba informasaun ne’ebé konfiável, governantes  sira sei asumi sira nia funsaun ho responsabiliza tomak nune’e, públiku iha duni konfiansa ba sira.

Liga ba tema loron Liberdade imprensa tinan nee, depois akompaña debates publiku no mos informasaun sira neebe sirkula iha mídia sira tantu online no eletroniku sira iha loron hirak liu ba  konaba disputa neebe akontese entre individu balun ho Mídia Online Hatutan, husik hela pergunta krítiku ida ne’ebé presiza ita nia atensaun. Individu nee envezde halo esklaresimentu ne’ebé saudavel, pelo kontrariu  liu husi programa 7 minutus RTTL nian  ho fiar-an fó sala ba mídia online HATUTAN ba nutisia balu, ho akuzasaun  halo distorsaun ba informasaun.

Atu dehan deit katak problema ne’e simples maibé kle’an. Iha sorin seluk, individu nee mos haluhan tiha katak  informasaun ne’ebé hanesan  publika mós  hosi  mídia estatal. Ida-ne’e signifika katak se substánsia hosi notísia hirak nee  konsidera falsu, akuzasaun sira labele diriji seletivamente ba parte ida de’it. Bainhira mídia balun sai alvu, enkuantu ignora tiha mídia seluk, públiku iha direitu atu husu: ida-ne’e tebes duni ka HATUTAN desvia informasaun neebe loos hodi halo nutisia laloos ou keta halo ida ne’e tentativa ida atu hili alvu balun hodi fó presaun ba mídia sira ne’ebé konsidera la konveniente ba ninia personalidade?.

Iha estadu demokrátiku, kada individu sira ne’ebe asumi papel hodi lidera instituisaun governu, sira iha obrigasoens hodi mantein transparénsia, aplika lei, no garante responsabilizasaun ba podér. Tamba hau fiar metin katak mídia sira mos sei la bulak, se wainhira kada individu sira asumi papel ho responsabilidade tomak tuir lei, mídia sei la bele halo publikasaun ho razaun odio ba ema nia personalidade.  Maibé, bainhira  hahú uza instituisaun estadu nian la’ós ba benefísiu povu nian, maibé liuliu atu proteje  erru pesoál ka interese polítiku,midia iha poder hodi kontrolu klalaok hirak nee liuhusi sira nia publikasaun bazeia ba evidensia sira ne’ebe iha.

Nune’e, bainhira individu ida ne’ebé responsavel ba setór komunikasaun sosial uza  ninia pozisaun hodi distorse informasaun atu defende nia an, problema la’ós ona simplesmente erru komunikasaun, maibé krize integridade pesoal nee. Grave liu tan maka wainhira uza instituisaun  estadu nia naran hodi legaliza ninia aktus sira hodi hasoru mídia independente sira, enkuantu informasaun hanesan publika mos husi mídia estatal rasik.

Asaun sira hanesan ne’e koñesidu hanesan konsentimentu fabrikadu—termu ida ne’ebé atu hateten katak ema  sira ne’ebé iha podér tenta atu forma persepsaun públiku la’ós liuhosi faktu objetivu sira, maibé liuhosi kontrolu narrativa no ida nee konsidera  nuudar aktus propaganda pesoal neebe uza aparellu estadu tamba poder neebe iha hodi justifika ninia hahalok pirante públiku.  Propaganda pesoal  dala barak fó énfaze ba narrativa sira ne’ebé iha parte ida de’it hodi mantein  ninia imajen, lejitimidade no podér. Asaun husi individu nee  demonstra tebes nuudar aktus represaun seletiva por razoens  politika e laos tamba nutisia neebe HATUTAN publika iha sira nia pajina. Tamba, se notísia nia substánsia maka konsidera problematiku, entaun krítika no lamentasoens tenke diriji mos ba parte hotu-hotu ne’ebé publika nutisia ne’e. Maibé saida maka akontese, mídia independente sira hanesan HATUTAN  maka tenke simu ninia konsekuensia liuhusi dalan hato’o Direito  retifikasaun ne’ebe konsagra iha Lei Komunikasaun Sosial  N.º 5 /2014 husi Artigu 2.º pontu f.

Iha prinsípiu, direitu ba retifikasaun maka parte ida hosi mekanizmu demokrátiku  entre individu ou instituisaun  estadu no mídia. Laiha buat ida maka  sala ho klarifikasaun se ida-ne’e hala’o ho proporsionál no bazeia ba faktu sira.  Bainhira iha individu balun ho  intensaun atu haruka direito retifikasaun ba mídia partikulár ida, enkuantu mídia estatal ne’ebe hatoo mos nutisia hanesan  la kona, públiku iha direitu atu deskonfia intimidasaun seletiva hirak nee. Ho nia natureza kria presaun psikolójiku ho linguazem oin oin inklui  risku legál sira ne’ebé maka persistente ba mídia hirak nee.

Iha ita nia kontestu, situasaun hirak nee reprezenta faktus sereidade hodi hamosu kualidade reportajen husi mídia sira. Se  publikasaun sira neebe atu fanun ema hot hotu nia konsiensia bazeia ba  obra  jornalístika nian mak sempre hasoru ho ameasa,  hau nia tauk maka kualidade nutisia sei hasoru bareira boot, tamba presaun hirak neebe maluk journalista sira hetan iha sira nia kobertura. Iha parte balun, hau apresia tebes ba korajen no determinasaun ne’ebe halo husi midia sira ne’ebe barani tebes hodi kebra sai asaun sira ne’ebe públiku la konsege deteta. Ida nee maka ita sempre dehan mídia iha funsaun hodi halao ninia papel konaba kontrolu sosiál, la’ós funsaun lealdade. Bainhira individu  sira sente perturbadu ho notísia sira, resposta ne’ebé loos maka halo esklaresimentu ida ne’ebé bazeia ba faktu no  la’ós mobilizasaun aparellu  instituisaun estadu nian hodi desvia lia loos husi nutisia sira ne’ebe publika sai huis mídia sira.

Kazu ne’ebe foin dadauk akontese ba mídia online HATUTAN,  hatudu momoos katak ameasa ba liberdade imprensa iha Timor-Leste la’ós sempre mosu ho maneira ho  forma sensura nakloke ka bandu  sira, maibé dala barak liuhosi prátika intimidasaun hodi halo  distorsaun informasaun no uza instituisaun estadu nian hodi ataka meius komunikasaun sosiál sira ne’ebé krítiku.

Bainhira instituisaun  Estadu ida ne’ebé tuir loloos atu salvaguarda komunikasaun públika, uza plataforma mídia governu nian hodi ataka meiu komunikasaun independente sira, konsideradu aplika hela pratika  abuzu poder. Pior liu tan, wainhira notisia hanesan publika mos husi mídia estatal, maibe HATUTAN deit mak sai alvu, publiku iha direitu atu julga katak asaun ida ne’e la’os tentativa ba esklaresimentu, maibe prosesu selesaun politika hodi determina se mak bele hetan kritika no se mak tenke hetan protesaun.

Se pratika sira hanesan ne’e kontinua hetan aseitasaun, ita sei  hakat ba kotuk tamba autoritarizmu komunikasaun  subar ona ho  linguajen institusionál nian. Reporters Without Borders iha ninia índise  klasifikasaun konaba liberdade imprensa  tinan 2025, fo sai katak Timor -Leste okupa numeru 39  kompara ho tinan 2024 wainhira Timor-Leste okupa numeru 20.  Relatoriu nee mos sublina katak indikadór polítiku maka hetan mudansas boot tamba iha  interferénsia polítika ba  mídia sira inklui  intimidasaun ba mídia sira ne’ebe krítiku tebes iha sira nia nutisi.  Indikadór hirak nee  relevante tebes  bainhira individu sira uza aparellu  estadu hodi  ataka mídia tanba hato’o reportajen ne’ebé la favoravel ba sira. Ida nee hatudu sinál sériu ida kona-ba mudansas estruturadu ba protesaun liberdade imprensa. Iha posibilidade boot katak tinan 2026, Reporters Without Borders  ninia índise  klasifikasaun konaba liberdade imprensa ba Timor – Leste nian sei tun tan.

Nee hanesan  alerta ida ba Timor-Leste, katak ita hasoru hela risku sistemátiku. Bainhira individu  sira ne’ebé tuir loloos proteje transparénsia maka hahu’u ona halo  atakas ba obra  mídia nian,  la’ós de’it liberdade imprensa mak sei hetan ameasa  maibé futuru demokrasia mos sei hetan presaun.

Ikus liu,  disputa entre individu balun ho mídia online HATUTAN,tenke sai klarifikasaun ida ne’ebé saudavel e bazeia ba  faktu ba parte hotu-hotu. Maibé bainhira resposta ida selektivamente dirije de’it ba mídia  ida, enkuantu fonte seluk ne’ebé publika informasaun hanesan la hetan tratamentu ne’ebe hanesan, ida-ne’e hatudu  sinal klaru kona-ba tentativa intimidasaun no la’ós simples esklaresimentu.

Disputa hirak nee hatudu momoos katak ameasa ba liberdade imprensa la sempre mai ho sensura direta, maibé mos bele mosu liuhosi intimidasaun seletiva, distorsaun informasaun no manipulasaun narrativa públika. Bainhira mídia krítiku sira sai alvu polítiku, ita la’o hela iha autoritarizmu komunikasaun ne’ebé subar ho linguajen institusionál. Katak,  autoridade polítika  sira sei  uza komunikasaun públika hodi kontrola informasaun hodi limita liberdade expresaun ho forma opiniaun públika tuir interese poder no  la’ós tuir verdade ka transparénsia.

Nune’e, defende liberdade imprensa la’ós de’it defende jornalista sira, maibé defende direitu povu nian hodi hetan informasaun loloos. Tamba Demokrasia la’ós kona-ba sé maka kontrola narrativa ho forsa sira, maibé sé maka onestu liu hodi koalia ho  faktu. ****