Nasionál
Preparasaun ba Misa Agradesimentu no Resesaun Kardeál Foun Atinje 70%
Hatutan.com, (26 Agostu 2022), Díli—Komisaun organizadora konjunta entre Conferência Episcopal Timorense (CET) ho Governu halo ona preparasaun ba serimónia resesaun no misa agradesimentu ba Kardeál dahuluk Uma Kreda Timor Leste nian, Dom Virgílio do Camo da Silva, SDB, Arsebispu Arkidioseze Díli, atinje ona 70%.
Komisaun organizadora konjunta entre Conferência Episcopal Timorense (CET) ho Governu halo ona preparasaun ba serimónia resesaun no misa agradesimentu ba Kardeál dahuluk Uma Kreda Timor Leste nian hasoru-malu ho Prezidente Repúblika José Ramos-Horta iha Palásiu Prezidensiál Nicolau Lobato Bairru-Pité, Sesta (26/08/2022). Foto/Média PR.
Komisaun organizadora atualiza ona preparasaun ne’e ba Prezidente Repúblika, José Ramos-Horta ne’ebé disponível mós sei partisipa iha sermónia importante ne’e iha Tasi Tolu iha 06 fulan Setembru 2022.
Lee Mós:Komunidade Timor Oan Iha Itália Simu D.Virgílio Iha Aeroportu Leonardo da Vinci
“Preparasaun ne’ebé komisaun halo ona iha terenu hahú kedan iha loron 15 Agostu no atinje ona 70%. Preparasaun espesífiku ne’ebé halo daudaun maka fatin atu misa, prepara tenda, prepara mós fasilidade sanitasaun móvel no hadi’a kanalizasaun bee inklui taka rai ku’ak iha fatin serimónia,” Prezidente Komisaun organizadora, Padre Guilhermino da Silva hateten hafoin hasoru-malu ho Prezidente Repúblika José Ramos-Horta iha Palásiu Prezidensiál Nicolau Lobato Bairru-Pité, Sesta (26/08/2022).
Komisaun Organizadora mós atualiza katak, Xefe Estadu disponível no kontente loos atu partisipa iha serimónia resesaun iha Aeroportu no mós misa agradesimentu iha Tasi tolu tanba ida-ne’e ondra boot ida ba povu no nasaun Timor Leste ne’ebé foin primeiravéz Vatikanu hili Timoroan ida ba Kardeál.
“Kardeál ne’e hanesan pozisaun ida, iha Uma Kreda Katólika ninian, no nia servisu hamutuk ho Papa iha Vatikanu. Ida-ne’e la signifika Arsebispu Dom Virgílio sai ona Kardeál no husik Timor, maibé nia Bispu nafatin, hanesan Kardeál no hela iha Timor, servisu iha Timor,” Padre Guilhermino da Silva hateten.
Sekuénsia ba resesaun ne’ebé sei hala’o iha loron 05 fulan Setembru, dader tuku 6:30 sarani no kleru sira sei ba iha Aeroportu Internasionál Prezidente Nicolau Lobato hodi simu Kardeál, iha loron tuir mai 06 Setembru sei iha selebrasaun misa agradesimentu iha Tasi Tolu.
Komisaun konjunta ne’ebé forma hosi Igreja no parte governu halo ona servisu balun iha terrenu, tantu iha Tasi tolu fatin serimónia no mós iha parte administrasaun liga ho konvite sira.
Iha planu komisaun nian, sei konvida mós Bispu sira iha nasaun viziñu sira hanesan Darwin, Atambua no Kupang, atu bele mai partisipa iha misa agradesimentu ba Kardeál primeiru Timorense nian.
Osan mai hosi CET no mós apoiu hosi governu ho totál $220.000-resin, ne’ebé komisaun konjunta ne’e iha hodi halo preparativu sira ba serimónia hotu misa agradesimentu nian.
Kardeál D.Virgílio do Carmo da Silva, SDB sei to’o Timor Leste iha loron 05 fulan Setembru ho aviaun Aero Atlántiku iha tuku 6:30 dadersan.
Lee Mós: Sé Mak Kardeál?
Jornalista: Vito Salvadór