Breaking News: Ahi Han Hangar Mission Aviation Fellowship iha Aeroportu Comoro

Hatutan.com, (11 Setembru 2022), Díli—Ahi han hangar Mission Aviation Fellowship (MAF) Timor Leste iha Aeroportu Internasionál Prezidente Prezidente Nicolau Lobato, Comoro, Díli, Domingu ne’e (11/09/2022).

Ahi Han Hangar Mission Aviation Fellowship iha Aeroportu Comoro, Dili, Domingu (11/09/2022). Foto/Supply

Informasaun ne’ebé Hatutan.com halibur hosi fontes oioin iha fatin akontesimentu iha Aeroportu Comoro katak insidente ki’ik ne’e deskonfia akontese tanba sirkúitu eletrisidade ne’ebé rezulta edifísiu hangar MAF nian ahi han no sasán balun la salva.

Aviaun MAF nian ne’ebé durante ne’e apoiu hala’o viajen emerjénsia hodi transporta ka evakua ema moras hosi munisípiu mai Dili, transporta nesesidade urjente seluk tan, inklui apoiu atividade turizmu hal’eu Timor sai tiha ona no la para iha hangar laran iha momentu ahi han hangar refere.

Fontes balun informa katak posivel boot eletrisidade mak sirkúitu tanba iha hangar bandu ema la bele lori iskeiru ka kualkér material ne’ebé bele hamosu ahi, inklui la bele fuma.

Aviaun MAF nian. Foto/MAF

Iha minutu balun nia laran, ekipa bombeiru to’o kedas iha fatin akontesimentu hodi rega mate ahi, inklui halo esforsu rápidu hodi salva  sasán importante balun ne’ebé ahi la konsege han.

To’o notísia ne’e publika seidauk iha konfirmasaun hosi parte Autoridade Aviasaun Sivíl ho mós parte kompetente sira tanba sei okupadu halo atendimentu bá situasaun ne’e.  

Iha fulan-Abríl 2022, Mission Aviation Fellowship (MAF) ho Governu Timor-Leste lansa voo regular bá illa Atauro ho apoiu hosi USAID Timor Leste  nia Projetu Turizmu bá Ema Hotu.

“Voo regular sira hanesan ne’e dala barak bele salva komunidade iha área remota sira nia vida,” Enkaregadu Negósiu Embaixada EUA, Tom Daley iha nia diskursu iha eventu lansamentu ne’e voo nee.

Voo ne’ e hanesan oportunidade importante ida ba dezenvolvimentu ekonómiku. Ida-ne’e, liu-liu, iha ámbitu indústria turizmu nian, ho viajen aérea hanesan ne’e loke oportunidade hirak ne’ebé seidauk esplora atu ema bele halo viajen ba iha destinu eko-turízmu sira no hetan esperiénsia kona-bá kultura no tradisaun foun sira.

Jornalista : Rogerio Cárcerres