Hatutan.com, (14 Setembru 2022), Díli— Relatóriu hosi Índise Pás Globál hatudu katak, iha dékada ikus liu Singapura ho Malázia mak nasaun rua ne’ebé moris hakmatek liu iha Sudeste Aziátiku.
Índise Pás Globál ka Global Peace Index (GPI) maka relatóriu ne’ebé produzidu hosi Institutu Ekonomia no Pás ka Institute for Economics and Peace (IEP).
GPI halo klasifikasaun ba nasaun hamutuk 163 no territóriu sira independentes ne’ebé reprezenta koletivamente populasaun mundiál 99,7% tuir sira nia nível pás nian.
Advertisement
GPI nia relatóriu ida ne’e bazeia ba pozisaun pás nian relativamente nasaun idaidak nian ho nia territóriu rasik.
Iha dékada ikus liu, GPI aprezenta tendênsia ida ba aumentu violénsia globál no falta de pás nian.
“Pozisaun di’ak liu hanesan nasaun ne’ebé moris hakmatek, seguru no laiha violénsia iha Sudeste Aziátiku maka nasaun Singapura ho Malázia,” Hatutan.com sita relatóriu GPI 2022.
Tuir relatóriu ne’e hatudu katak, nasaun ne’ebé laiha estabilidade seguransa iha Sudeste Aziátiku maka nasaun Myanmar ho Filipina.