Nasionál
Prezidente Repúblika Sei La Simu Subsídiu “Fim do Ano” no Husu Governu Atribui Bá Povu Vulnerável
Hatutan.com, (29 Setembru 2022), Díli- Prezidente Repúblika (PR), José Ramos-Horta deklara, la simu subsídiu anual “fim do ano” $200 bá uma-kain. Nia husu bá Governu atu atribui de’it bá família sira dezempregu no uma-kain sira ne’ebé vulneravel liu iha sosiedade.
PR Ramos-Horta, Kinta (29/09/2022), to’o fali iha Timor-Leste hafoin semana ida hala’o vizita Estadu bá Nova Iorke. Foto/Elio dos Santos da Costa
Tuir Xefe Estadu nia hanoin katak iha alternativa rua ne’ebé Governu bele uza hodi fahe subsídiu “fim do ano” $200 bá uma-kain; dahuluk, bele karik subsídiu “fim do ano” di’ak liu Governu fó de’it bá komunidade ne’ebé empregu laiha ka bele karik fó mós bá sira ne’ebé vensimentu ne’e ki’ik loos.
Daruak nian, ukun na’in no funsionáriu no ajente administrasaun públiku sira ne’ebé ho saláriu boot, ida-idak ho konsiénsia rejeita subsídiu “fim do ano” ne’e hodi husik osan ne’e tun bá povu ne’ebé nesesita liu.
“Ha’u hateten ona katak 50% hosi ha’u nia vensimentu hanesan Xefe Estadu ha’u fahe bá organizasaun sira ne’ebé tau matan bá ema kiak sira, ida ne’e ha’u halo dezde uluk ha’u nia primeiru mandatu,” José Ramos-Horta hateten hodi responde Hatutan.com iha Aeroportu Internasionál Prezidente Nicolau dos Reis Lobato, Díli, Kinta (29/09/2022).
Xefe Estadu nia perdiem ka alojamentu sira hosi viajen sira iha rai-laran ho rai-li’ur ne’ebé nia halo durante ne’e entrega tomak bá iha fundu espesiál ida iha gabinete Prezidénsia Repúblika para bele fahe bá individu ka organizasaun balun ne’ebé servisu di’ak no tau matan ba ki’ak sira.
Ramos-Horta apela bá sidadaun hotu ne’ebé manan saláriu hanesan ajente administrasaun públiku liu $1000 di’ak liu husik ka fó tiha hirak saláriu menus hosi $200 ka bá família vulneravel iha sosiedade ne’e.
“Atu dia’k liu Governu tenke halo desizaun polítika ida hanesan ajuda espesiál ne’ebé Governu halo iha 2020 bainhira ita aplika Serka Sanitaria hodi luta kombate propagasaun Covid-19. Ita fó de’it subsídiu bá sira ne’ebé rendimentu menus hosi $500 kada fulan,” Ramos-Horta afirma.
Jornalista: Vito Salvadór