PNTL Detein JPP Ne’ebé Deskonfia Sona-mate Aires Celestino Adelaide

Hatutan.com, (07 Novembru 2022), Díli—Polísia Nasionál Timor-Leste (PNTL), Komandu Munisípiu Díli, liuhosi Eskuadra Dom Aleixo halo detensaun ba JPP ne’ebé deskonfia sona mate Aires Celestino Adelaide iha área Lurumata, Díli.

Matebian Aires Celestino Adelaide. Foto Espesiál.

Komandante PNTL Munisípiu Díli, Superintendente Xefe Polísia Henrique da Costa informa, iha Domingu (06/11/2022), hale’u tuku 20:30 kalan Otl, mosu duni insidente sona-malu ida iha área Lurumata, Suku Fatuhada, Postu Administrativu Dom Aleixo, Munisípiu Díli.

“Suspeitu ho evidénsia agora iha hela ita-nia investigadór sira nia liman iha Dom Aleixo. Ita detein ho inisial JPP. Matebian Aires ne’e konsege bá tiha duni Ospitál maibé la konsege salva,” Superintendente Xefe Polísia, Henrique da Costa hateten liuhosi konferénsia imprénsa iha kna’ar fatin Komandu Caicoli, Segunda (07/11/2022).

Tuir informasaun inisiál ne’ebé PNTL rekolla iha terrenu katak, kazu ne’e akontese bainhira vítima ho suspeitu halimar hamutuk hela iha uma, tanba konsidera malu nu’udár kolega ka belun, maibé ikus mai, suspeitu foti tudik hodi sona fila-fali nia kolega.

“Ne’e tuir informasaun inisial ne’ebé mak ita hetan. Maibé, agora daudaun suspeitu ho evidénsia iha Eskuadra Dom Aleixo, ita-nia parte investigasaun sei prosesa hela,” komandante Henrique hateten.

Parte investigadór sira PNTL nian sei presiza haree mós bá iha Sertidaun moris suspeitu nian, tanba seidauk iha informasaun ne’ebé klaru kona-bá suspeitu nia identidade maski suspeitu hateten ona katak, nia moris iha 2007.

“Maibé, ita presiza provas tenke hato’o ninia sertidaun moris nian nune’e ita konfirma loos duni ka la’e,” komandante Henrique hateten tán.

Komandante Díli ne’e dehan, investigasaun bá kazu ne’e sei la’o hela maibé informasaun inisiál ida ne’ebé mak PNTL hetan katak, vítima ho suspeitu sira konsidera malu hanesan kolega, tán ne’e mak sira halimar hamutuk.

“Ne’e mak aviza bá públiku katak, halimar ho sasán kro’at ne’e perigu. Krime  barak  akontese tanba ema sira koñese malu ne’e,” komandante Henrique, fó hanoin.

Jornalista: Rogério Pereira Cárceres