Lei númeru 3/2006, loron 12, fulan-abril ko’alia kona-bá Esatutu bá ema Kombatente nian iha luta Libertasaun Nasionál, ne’ebé mak altera ho lei númeru 09/2009, loron 29, fulan-jullu no lei númeru 2/2011, loron 23 fulan-marsu, afirma fila-fali kompromísu Estadu TL nian atu rekoñese no valoriza esforsu sira ne’ebé halo ona hosi kombatente sira bá luta libertasaun nasionál, no fó onra bá Martir sira durante luta bá Independénsia Nasionál.
Advertisement
Tanba ne’e, kondekorasaun ida ne’e, nu’udár direitu ida ne’ebé pertense bá Kombatente sira bá libertasaun nasionál nian, ne’ebé mak prevee ona iha lei ida ne’e.
Serimónia kondekorasaun sira hahú no kontinua hala’o pur faze. Imposibilidade atu fó kondekorasaun bá Kombatente hotu-hotu iha tempu hanesan, maibé presiza determina faze sira iha prosesu ida-ne’e.
Kombatente hotuhotu, tuir termus ne’ebé prevee iha lei, sei hetan rekoñesimentu no valór hosi Estadu Timor-Leste, tanba kolaborasaun ne’ebé dedikadu no onrável, ne’ebé kombatente sira fó ona bá luta independénsia nasionál.
Jacob Fernandes, kódigu (Seu), postu Soldadu, grau Medalla.
Domingos Borges Soares, kódigu (Halibur), postu Soldadu, grau Medalla.
Floriano Soares Borges, kódigu (Hakat Sai), postu Soldadu, grau Medalla.
Maria Madeira Jong, kódigu (Ferik), pozisaun Membru OPMT, grau Medalla.
Petronila de Brito, kódigu (Bui Tane Lamu), pozisaun Membru OPMT, grau Medalla.
Prezidente Repúblika, Ramos-Horta haree mós bá alinea (j) hosi artigu 85 Konstituisaun RDTL, konjuga ho lei númeru 5 hosi artigu 2 Dekretu-Lei númeru 15/2009 loron 18 fulan-marsu, dekreta mós kondekorasaun bá sidadaun estranjeiru na’in-haat (4) ho grau Medalla Méritu nian, mak hanesan;
Martyn John Dunne
Noel Bay Ley
Gusti I Made Agung Sudjana
Viktor Bungtilu Laiskodat
Laiskodat Konsidera Hanesan Prémiu
Governadór Provínsia Nusa Tenggara Timur (NTT), Viktor Buntilu Laiskodat sente kontente tanba bele hetan kondekorasaun ho grau Medalla Méritu hosi Estadu Timor-Leste.
Advertisement
Xefe Estadu José Ramos-Horta, kondekora entrega sertifikau na’in ba rai ba komunidade no kondekora Governadór NTT, Viktor Buntilu Laiskodat medalla órden Timor-Leste (TL) nian iha ámbitu serimónia komemorasaun loron proklamasaun unilaterál 28 Novembru, iha Aiteas Manatuto.
“Bá da-uluk ha’u kontente tebtebes tanba bele simu medalla hosi Estadu Timor-Leste. Prémiu boot ida ne’ebé Xefe Estadu rasik maka oferese mai Ha’u,” Laiskodat hatete hafoin serimónia hasa’e Bandeira RDTL bá komemorasaun loron Proklamasaun Independénsia, iha área Kampung Baru, Suku Ai-teas, Manatuto Vila, Segunda (28/11/2022).
Hanesan governadór bá NTT nia parte orgullu tanba illa ida ne’e bele iha nasaun ida ne’ebé besik mós provínsia nomós estadu Indonézia. Tuir nia, ida ne’e, seidauk hakerek iha istória mapa mundiál nian.
“Illa ki’ik ida hanesan ne’e fahe ba nasaun rua. Ida-ne’e foin primeiravéz no modelu ida-ne’e mós diferente tebes. Espera relasaun di’ak ne’e sei halo Timor-Leste no Timor Osidentál bele dezenvolve di’ak liután. Tanba parte rua sei apoia malu iha programa zona lívre komérsiu nian iha tempu tuir mai,” Laiskodat afirma.
Programa zona lívre komérsiu sei fó fatin ba Timor-Leste no Timor Osidentál no ohin loron Indonézia hanesan ekonomia ida ne’ebé forte liu iha mundu no ida ne’e sei sai nu’udár mudansa boot ida bá dezenvolvimentu Timor-Leste no Timor Osidentál.
“Espera programa ida ne’e bele sai nu’udár susesu ida eztraordináriu no dala-ida tán ha’u hato’o parabéns espesiál bá povu Timor ne’ebé ohin selebra loron Independénsia bá dala-47,” Governadór NTT ne’e hateten tán.
Kondekorasaun hirak ne’e atribui direta hosi Prezidente Repúblika (PR), José Ramos-Horta, Prezidente Parlamentu Nasionál (PPN), Aniceto Guterres, ho Prezidente Tribunál Rekursu (PTR), Deolindo dos Santos, iha seremónia komemorasaun Aniversáriu Proklamasaun Independénsia Unilateral RDTL, dala-47, iha Suku Aiteas, Postu Administrativu Manatuto Villa, Munisipiu Manatuto.