Inkonstitusionalidade Fundu Veteranu La Afeta bá OJE 2023

Hatutan.com, (14 Dezembru 2022), Díli— Prezidente Parlamentu Nasionál (PPN), Aniceto  Guterres konsidera Fundu bá Kombatente Libertasaun Nasionál ho billaun $1 ne’ebé pronunsiadu hosi Tribunál Rekursu (TR) inkonstitusionál iha Tersa (13/12/2022), ida-ne’e la afeta bá Orsamentu Jerál Estadu (OJE) tinan fiskál 2023.

Prezidente Parlamentu Nasionál (PPN), Aniceto Guterres hasoru malu ho Prezidente Repúblika (PR), José Ramos-Horta.

“Tribunál dekreta ona ne’e inskonstitusional, fundu ida-ne’e fika-sein-efeitu. Mas deklarasaun ida inkonstitusionalidade bá fundu ne’e la afeta bá orsamentu no Prezidente Republika, ohin lokraik sei promulga Orsamentu Jerál Estadu, no rezerva ida ohin inskonstitusional ne’e. Ami mai ko’alia ida-ne’e,” Aniceto Guterres hateten hafoin sorumutu ho Ramos-Horta, iha Palásiu Prezidensiál Ai-tarak Laran, Dili, Kuarta (14/12/2022).

Lee Mós: Breaking News: TR Deklara Fundu Veteranu iha OJE 2023 Inkonstitusionál

Durante sorumutu ne’e, Aniceto ho Ramos-Horta ko’alia kona-bá promulgasaun bá orsamentu ne’ebé ninia parte ida no Tribunál Rekursu deklara inskonstitusionál, liu-liu verba ida kona-bá Fundu Veteranu nian.

Desizaun ida-ne’e, Aniceto dehan hakarak ka lakohi Prezidente Repúblika ho Tribunál Rekursu ezerse sira nia devér konstitusionál, no desizaun Tribunál ne’e prevalese hotu kualkér desizaun Estadu.

OJE 2023 ne’ebé PR Ramos-Horta atu hola pozisaun bá promulgasaun, eseptu ka la inklui fundu veteranu nian ida ne’ebé mak Tribunál deklara inkonstitusionál ona.

“Ida-ne’e laiha efeitu ona. Ida-ne’e Prezidente la promulga tanba ne’e obrigatoriumente tenke hanesan ne’e,” Aniceto Guterres, hateten.

Maske nune’e, la signifika Governu laiha ona dalan seluk atu hola medidas politika ruma hodi fó solusaun bá problema sira veteranu nian. Governu iha dalan barak no bele hola inisiativa ho forma seluk.

“Sim, hasai ka la hasai mós laiha efeitu. Montante hira, agora ita boot sira hatene. Orsamentu sé ida ne’e hanesan laiha efeitu ona, orsamentu jerál estadu ne’e menus $1 billaun,” Aniceto Guterres, afirma.

Jornalista: Rogério Pereira Cárceres