Polítika
Xanana Apresia Tribunál Deklara Inkonstitusionalidade Billiaun $1 bá Fundu Veteranu
Hatutan.com, (14 Dezembru 2022), Díli— Lider nasionál Kay Rala Xanana Gusmão apresia ho Tribunál ne’ebé deside inkonstitusionalidade billiaun $1 bá fundu veteranu ne’ebé Governu tau iha OJE 2023.
Lider nasionál Kay Rala Xanana Gusmão.
Ho desizaun ne’e, Xanana Gusmão konsidera konsidera Tribunál hatudu dadaun ona ninia independénsia no imparsialidae atu ema bele hahú fiar katak, juiz sira komesa haree bá Estadu ne’e nu’udár Estadu.
Lee Mós: Breaking News: TR Deklara Fundu Veteranu iha OJE 2023 Inkonstitusionál
“Saida mak la di’ak tenke dehan la di’ak. La’ós dehan taka-matan. Ne’ebé ha’u saúda Tribunál, juiz sira no ha’u komprende tebtebes. Tanba fofoun ha’u rona mós, ha’u dehan eipah, susar. Ne’e duni, la ko’alia hanesan veteran tanba ha’u la’ós veteranu, mas ko’alia hanesan sidadaun ida, ha’u laiha buat ida. Ha’u tenke kongratula Tribunál de kontas, hodi fó-sai desizaun ida ne’ebé loos tebes,” Xanana hateten hafoin enkontru ho Prezidente Repúblika, José Ramos-Horta iha Palásiu Prezidensiál Bairru-Pité, Kuarta (14/12/2022).
Xanana Gusmão deklara katak, nia la’ós veteranu tanba ne’e maka to’o oras-ne’e nia rasik seidauk rejistu no lakohi duni atu ema bolu nia ho lia-fuan veteranu.
“Ha’u la veteranu ida. Hothotu hatene ona kuandu atu bá sai veteranu ne’e tenke bá rejistu. Ha’u la rejísta, labele bolu ha’u veteranu. Atu bá rejístu karik, só sira ne’ebé ha’u koñese dehan veteranu duni, sira hotu hetan ona diploma ruma, rekoñese sira ka saida, prontu mak ha’u tuir bá. Enkuantu sira seidauk, sira terus liu ha’u, enkuantu seidauk, ha’u la veteranu,” Kay Rala Xanana Gusmão, hateten.
Tribunál Rekursu (TR) deklara Fundu Kombatentes Libertasaun Nasionál (FCLN sígla potugés) ne’ebé Governu kria iha Orsamentu Jerál Estadu (OJE) Retifikativu 2022 no kontinua iha Proposta OJE tinan 2023 inkonstitusionál, iha Tersa (13/12/2022).
Lee Mós: Inkonstitusionalidade Fundu Veteranu La Afeta bá OJE 2023
Jornalista: Rogério Pereira Cárceres