SEFOPE Apela bá Kandidatu Traballadór 31 Labele Sees Hosi Sistema Austrália

Hatutan.com, (06 Fevereiru 2023), Díli—Sekretária Estadu Formasaun Profisionál no Empregu (SEFOPE), apela bá kandidatu traballadór Timoroan na’in-31 ne’ebé atu bá serbisu iha Austrália, labele halai sees hosi sistema serbisu ne’ebé na’in bá kompañia ABC rasik kontrata ona.

Kandidatu traballadór Timoroan na’in-31 ne’ebé atu bá serbisu iha Austrália realiza asina akordu ho familia iha salaun DNEE, Becora, Segunda (06/02/2023). Foto/Média SEFOPE.

Diretór Nasionál Empregu Exteriór (DNEE) iha SEFOPE, Filomeno Soares hato’o apelu ne’e durante serimónia despedida no asina deklarasaun entre família traballadór hó SEFOPE iha salaun DNEE, Becora, Segunda (06/02/2023).

Lee Mós: Autoridade Seguransa Sei Blokeia Traballadór Hosi Ajénsia Ilegál

Diretór Filomeno Soares hateten, serimónia asina deklarasaun ne’e hanesan konkordánsia ida hosi parte família hó Governu liuhosi SEFOPE, katak família prontu atu husik nia feen, la’en ka nia oan atu ba serbisu iha Austrália la’ós governu mak obriga, nune’e mosu problema ruma parte rua iha hotu responsabilidade hodi rezolve.

“Hakarak mós apela bá joven Timor-oan na’in tolu-nulu-resin-ida (31) ne’ebé hetan ona oportunidade ne’e, ba servisu atu hatudu komportamentu ne’ebé di’ak. Labele halai sees hosi sistema, tanbá imi mak sai sáve atu empregadór sira bele emprega tán joven rihun sanulu-resin-lima ne’ebé he’in hela iha sistema work ready pool SEFOPE ni’an,” Hatutan.com sita komunikadu, Segunda (06/02/2023).

Bá serbisu iha ema nia ra’in la’ós permanente, maibé ba serbisu atu aproveita hetan esperiénsia no manán ema nia osan, nune’e fila mai Timor bele hadi’a ekonomia família no kresimentu ekonómiku Timor-Leste nian.

Husu mós bá família traballadór sira labele halo problema hodi prezudika sira nia serbisu no karik sira haruka osan mai Timor, husu atu utiliza hó didi’ak, tanbá antes sira hetan osan hirak ne’e, sira hasoru serbisu ne’ebé todan tebes iha ema nia rain.

Tuir dadus, traballadór timoroan sira ne’ebé oras ne’e serbisu iha Austrália hamutuk ema 2.000-resin.

Jornalista: Rogério Pereira Cárceres