Sentru Saúde Comoro Rejista Pasiente ISPA ho Númeru As

Hatutan.com, (27 Fevereiru 2023), Díli– Durante fulan-Fevereiru 2023, Sentru Saúde Comoro, Postu Administrativu Don Aleixo, Munisípiu Díli, rejista pasiente moras infesaun respiratóriu alta (ISPA) hamutuk 6,179.

Lee Mós : Edifísiu Sentru Saúde Atsabe Ameasadu Hosi Rai-Halai

Sentru Saúde Comoro. Foto/Lazaro Pereira Quefi

Xefe Sentru Saúde Comoro, Emilia A.de Sousa, hateten durante fulan-Fevereiru ne’e númeru pasiente ne’ebé rejista as liu mak pasiente sira moras ISPA tanba mudansa klimátika, udan, anin no rai-manas provoka rai-rahun maka’as.

Moras seluk mós rejista iha Sentru Saúde Komunitária Comoro, maibé númeru pasiente ne’ebé ki’ik. Moras hirak-ne’e mak hanesan moras kulit, diária, asidente, anemonia, mánutrisaun, matan-mean, tuberkuloze (TBC) no seluk tan..

“ISPA nia sintoma ne’e mai hosi klima tanba udan, udan kuandu mai beibeik derrepente de’it udan para,  ne’e rai-manas   bainhira rai manas prodús rai-rahun barak entaun fó impaktu bá ita-nia saúde liu-liu ba iha respiratóriu nian ,tanba ne’e, ha’u husu bá hotu-hotu atu sai ba fatin ruma karik presiza uza máskara para nune’e evita moras ISPA,” Emilia A. de Sousa hateten bá Hatutan.com  iha Sentru Saúde Comoro, Segunda (27/2/2023).

Xefe Sentru Saúde ne’e mós haktuir kona-bá kondisaun no fasilidade iha Sentru Saúde ne’e la’o normal, liu-liu bá funsionamentu eletrisidade no bee-moos  funsiona ho di’ak kompara  ho tempu liubá.

Xefe Sentru Saúde Comoro, Emilia A.de Sousa.

Pesoál saúde iha Sentru Saúde  Comoro hamutuk na’in-148, kompostu husi médiku  na’in-46, parteira (36), enfermeiru/a  (26), farmásia (9), dentista (7), analista laboratóriu (4), nutrisaun (2), sistema relatóriu (1), motorista 3, pesoál limpeza na’in-9, lojístika (1) no na’in-3 seluk tan.

“Ami husi Sentru Saúde Komunitária (SSK) Comoro bá oin nafatin hatudu ami nia atendimentu ho  profisionalizmu maske enfrenta dezafiu oioin,  maibé ami mantén nafatin ami nia prinsípiu kona-bá atendimentu bá tratamentu pasiente sira tenke ho di’ak,”  Emilia A. de Sousa hateten.

Jornalista Estajiáriu : Lazaro Pereira Quefi